ئانتالیا - AA
ئەنجوومەنی رۆژنامەنووسانی جیهانی (KGK)، خەڵاتی جیهانیی سەرکەوتن-ی بەسەر ژمارەیەک دامەزراوە، رێکخراو و کەسایەتیدا دابەش کرد کە ئاژانسی ئانادۆڵوشیان لەنێودابوو.
لە چوارچێوەی بەرنامەی ''دیداری ئالانیا بۆ ئەنجوومەنی رۆژنامەنووسانی جیهانی'' کە زیاتر لە ١٠٠ رۆژنامەنووس لە ناوخۆ و دەرەوەی تورکیای کۆکردەوە، رێوڕەسمی بەخشینی خەڵاتی ئالانیا بەڕێوەچوو.
دوای ساتێک وەستان بۆ گیانی ئەو رۆژنامەنووسانەی کە بەهۆی پەتای ڤایرۆسی کۆرۆنای نوێوە گیانیان لەدەستداوە، مارشی سەربەخۆیی لێدرا.
لە رێوڕەسمەکەدا، وەزیری ھەرێم بۆ کاروباری پێکھاتەکان لە حکوومەتی هەرێمی کوردستان و ئەندامی ئەنجوومەنی کارگێڕی بەرەی تورکمانی عێراق، ئایدن مەعروف گوتارێکی پێشکەش کرد و ئاماژەی بەوە کرد کە تورکیا وڵاتێکی زۆر گرنگە و گوتی: ''وەک تورکمانە عێراقییەکان هەمیشە پشتیوانیمان لە پەیوەندییەکانی نێوان تورکیا و عێراق کردووە''.
ئایدن مەعروف باسی لە گرنگیی میدیا کرد و رایگەیاند ''ئاژانسی ئانادۆڵو بووەتە دەنگی خەڵکی ستەمدیدە، بەتایبەتی تورکمانەکان، دەنگی ستەمدیدەکانی ئەوێ دەگەیەنێتە هەموو جیهان بەتایبەتی تورکیا. لەبەرئەوە سوپاستان دەکەین''.
بەڕێوبەری گشتیی و سەرۆکی دەستەی بەڕێوەبردنی ئاژانسی ئانادۆڵو، سەردار کاراگۆز سوپاسی ئەنجوومەنەکەی کرد بۆ پێشکەشکردنی خەڵاتەکان.
سەردار کاراگۆز ئاماژەی بەوە کرد کە ئاژانسی ئانادۆڵو تەمەنی ١٠١ ساڵە و گوتی: "لە قۆناغی داهاتوودا دەبین بە ئاژانسێک کە دەنگی زۆرترین و زیاتری خەڵک دەگەیەنین بە جیهان".
لەلایەن خۆیەوە سەرۆکی گشتیی ئەنجوومەنی رۆژنامەنووسانی جیهانی، مەهمەت عەلی دیم ئاماژەی بەوە کرد کە ئەنجوومەنەکە لە ناوخۆی وڵاتدا وەک رێکخراوێکی پیشەیی راگەیاندن بەمەبەستی دەستەبەرکردنی یەکێتیی، پێکەوەژیان و پشتیوانیکردنی یەکتری چالاکی ئەنجام دەدات و لە دەرەوەی وڵاتیش کار دەکات بۆ ئاراستەکردنی ئەو هێزە کاریگەرەی میدیا کە بە هاوکاری ئەندامانی دروستبووە بۆ پشتیوانیکردن لە چالاکییە دیپلۆماسییە گشتییەکانی تورکیا.
دوای پێشکەشکردنی گوتارەکان، خەڵاتی جیهانیی سەرکەوتن، بەخشرایە هەریەک لە ئایدن مەعروف، ئاژانسی ئانادۆڵو، تیمی نیشتمانی تۆپی پێی کەمئەندامانی تورکیا و رۆژنامەنووس، وەلی ئاڵتنکایا کە بەهۆی پەتای ڤایرۆسی کۆرۆنای نوێوە گیانی لەدەستداوە و یەکێک بوو لە ئەندامانی دامەزرێنەری ئەنجوومەنەکە.
