کاڵن: "پەیەدە/یەپەگە دەیەوێت داعش وەک کارتی فشاری سەودا و مامەڵە دژی خۆرئاوا بەکاربھێنێت"

بەرلین- AA

گوتەبێژی سەرۆکایەتی کۆماری تورکیا، ئیبراھیم کاڵن، ئاشکرایکرد بڕیاری کڕینی سیستمی S-400 لە شەوێکدا نەدراوە و رایگەیاند: "کارکردن لەسەر وردەکارییە تەکنیکییەکان درێژەی ھەیە. S-400ەکان ناکرێنە تەواوکاری سیستمی ئاسایشی ناتۆ یان سیستمی بەرگریی ئاسمانییەکەی. وەک سیستمێکی بەرگریی سەربەخۆ دەمێنێتەوە. دەکرێت نیگەرانییەکان لەوبارەیەوە بڕەوێنرێنەوە".

ئیبراھیم کاڵن لە میانی بەشدارییکردنی لە دانیشتنێکدا لە دیداری بەرلین بۆ سیاسەتی دەرەوە کە لەلایەن دەزگای کۆربەر رێکخرابوو، وەڵامی پرسیارەکانی رۆژنامەوان، تیم سێباستیان و بەشداربووانی دایەوە.

کاڵن تیشکی خستەسەر ئەوەی کە تورکیا دەتوانێت بەرەنگاری داعش ببێتەوە و بە ئەمریکاشی گوتووە کە پێویستی بە پەکەکە و پەیەدە نییە بۆ ئەو مەبەستە و تەنھا ئەوەندە بەسە کە پشتیوانیی ئاسمانیی ھەبێت بەڵام ئەمریکا ئەوەی ھەڵبژاردووە کە لەژێر ناوی بەرەنگاربوونەوەی داعشدا پشتیوانیی لە رێکخراوە تیرۆریستییەکان بکات و رایگەیاند: "پەیەدە/یەپەگە دەیەوێت داعش وەک کارتی فشاری سەودا و مامەڵە دژی خۆرئاوا بەکاربھێنێت. بەوان دەڵێن ئەگەر پەیەدە/یەپەگە نەبێت، ئەوا سەرکەوتن لە دژی داعش بەدەستنایەت. ئێمە ھەر لە سەرەتاوە دژی ئەمەین چونکە ناتوانیت لەرێگەی بەکارھێنانی رێکخراوێکی تیرۆریستییەوە لەدژی ئەوی دیکەیان بجەنگیت".

گوتەبێژی سەرۆکایەتی کۆماری تورکیا جەختی لەوەکردەوە ئەو بوختانانەی باس لەوە دەکەن لەمیانی ئۆپەراسیۆنی کانی ئاشتیدا کورد و بەتایبەت کەمایەتییە کریستیانەکان کراونەتە ئامانج و دەستدرێژییان کراوەتە سەر، دوورن لە راستییەوە و ئەو قسە ھەڵبەستراوانە لەلایەن رێکخراوە تیرۆریستییەکانەوە بڵاودەکرێنەوە.