Agim Sulaj
02 Mars 2023•Përditësim: 03 Mars 2023
Është mbajtur në Prishtinë konferenca "Arsimi gjithëpërfshirës – nga politika në praktikë" e organizuar në kuadër të projektit të përbashkët të Bashkimit Evropian dhe Këshillit të Evropës "Ndërtimi i Kapacitetit për Arsim Gjithëpërfshirës – INCLUDE" në partneritet me Ministrinë e Arsimit, Shkencës, Teknologjisë dhe Inovacionit (MASHT), raporton Anadolu.
Qëllimi i këtij projekti është mundësimi i një platforme të gjerë për diskutim dhe shkëmbim shembujsh të praktikës së mirë ndërkombëtare dhe vendore. Në konferencë morën pjesë kryeministri Albin Kurti, ministrja e MASHTI-t, Arbërie Nagavci, përfaqësues nga Zyra e Bashkimit Evropian në Kosovë, ambasadave organizatave vendore dhe ndërkombëtare që punojnë në fushën e arsimit, komunave si dhe aktorë të tjerë përkatës.
Kryeministri i Kosovës, Albin Kurti tha se qëllimi i këtij projekti është në përputhje edhe me planet e Qeverisë së Kosovës.
Ai tha se Qeveria shpalli vitin 2022 si vit i personave me nevoja të veçanta ku ndër të tjera janë bërë të qarta edhe nevojat speciale të kësaj kategorie për një arsimim të barabartë.
Kurti tha se shoqëria më e mirë në Kosovë duhet të reflektojë në shkolla dhe shkollat duhet të reflektojnë mundësi të barabarta për të gjithë.
"Duam që secili fëmijë të jetë në shkollë dhe të marrë mbështetjen që të zhvillojë shkathtësitë e nevojshme për ardhmërinë e vet dhe të shtetit tonë", theksoi Kurti.
Ministrja e MASHT-it, Arbërie Nagavci tha se projekti "Ndërtimi i Kapacitetit për Arsim Gjithëpërfshirës" synon të rrisë përfshirjen dhe të përmirësojë qasjen në arsim cilësor të nxënësve nga grupet e pafavorizuara në arsimin parashkollor, fillor dhe të mesëm në përputhje me standardet dhe praktikat më të mira evropiane.
Nagavci tha se më konkretisht me këtë projekt fuqizohet kapaciteti i sistemit arsimor të Kosovës për të përmirësuar pjesëmarrjen dhe shërbimet mbështetëse për fëmijët e komunitetit rom, ashkali dhe egjiptian dhe fëmijët me nevoja të veçanta.
"Ne besojmë fuqishëm se arsimi është instrumenti thelbësor për të ndryshuar të ardhmen e përfshirjes së komuniteteve, të nxënësve me aftësi të kufizuara dhe se përmes arsimit gjithëpërfshirës rrisim mundësinë për punësim, pavarësinë intelektuale dhe financiare të një angazhimi qytetar në vend, por mbi të gjitha hapim dhe tejkalojmë pengesat komunitare mes qytetarëve të Republikës së Kosovës", theksoi Nagavci.
Konferenca prezantoi ekspertë të shquar të cilët dhanë prezantimet e tyre rreth kontekstit të punës së Këshillit të Evropës në fushën e arsimit cilësor gjithëpërfshirës dhe në lidhje me Kornizën e Referencës së Kompetencave për Kulturën Demokratike dhe Edukimin e Qytetarisë Dixhitale.
Rezultatet e pritura nga kjo konferencë janë platforma e aktivizuar për diskutim mes palëve kryesore të interesit; përkushtimi, motivimi dhe fuqizimi i shtuar i palëve përkatëse të interesit drejt qëllimit të përbashkët dhe rekomandime për nxitjen e arsimit cilësor dhe gjithëpërfshirës.
