Iran, gjendet kutia e zezë e aeroplanit ukrainas të rrëzuar

Autoritetet e Iranit kanë gjetur kutitë e zezë të aeroplanit ukrainas të pasagjerëve që u rrëzua menjëherë pas ngritjes nga kryeqyteti Teheran, transmeton Anadolu Agency (AA).

Sipas agjencisë gjysmë zyrtare të lajmeve Mehr, Ali Abedzadeh, kreu i Agjencisë së Aviacionit Civil të Iranit, tha se shkaku i rrëzimit ende nuk është përcaktuar.

• Rrëzohet një avion në Iran, humbin jetën 176 persona
• Irani përgënjeshtron pretendimet se "avioni i pasagjerëve është rrëzuar me raketë"
• Në rrëzimin e aeroplanit ukrainas humbën jetën 63 shtetas kanadezë

Abedzadeh gjithashtu njoftoi se vendi i tij nuk do t'i jepte kutinë e zezë Boeing-ut, duke thënë se janë duke shqyrtuar që t'ia dorëzojnë një vendi të tretë.

Aeroplani Boeing 737 që i përkiste Kompanisë Ajrore Ndërkombëtare të Ukrainës u rrëzua pranë Aeroportit Imam Khomeini të Iranit menjëherë pas fluturimit në orët e mëngjesit të sotëm.

Të gjithë 167 pasagjerët dhe nëntë anëtarët e ekuipazhit në aeroplan vdiqën në përplasje. Avioni ishte drejtuar për në kryeqytetin e Ukrainës, Kiev.

Abedzadeh tha se shkaku i incidentit do të zbulohet pas ekzaminimit të regjistruesve të aeroplanit në kutinë e zezë, duke shtuar se procesi do të kryhet nga një komision i Organizatës së Aviacionit Civil të Iranit.

"Ukrainasit mund të bashkohen në mbledhjet e komitetit", shtoi ai.