Ekip
04 Tetor 2022•Përditësim: 05 Tetor 2022
Koreja e Jugut dënoi fuqishëm Korenë e Veriut për gjuajtjen e një rakete balistike dhe paralajmëroi Phenianin për sanksione më të forta dhe pasoja të tjera, transmeton Anadolu Agency (AA).
Në një deklaratë pas një takimi të Këshillit të Sigurisë Kombëtare (NSC) të kryesuar nga presidenti Yoon Suk-yeol, të transmetuar nga Agjencia e Lajmeve Yonhap, presidenca e Koresë së Jugut tha se veprimi i Koresë së Veriut është një shkelje e rezolutës së Këshillit të Sigurimit të OKB-së.
"Raketa e Koresë së Veriut ishte në kundërshtim të qartë me rezolutat e Këshillit të Sigurimit të OKB-së dhe një provokim serioz që kërcënonte paqen në Gadishullin Korean, në Azinë Verilindore dhe më gjerë", citoi deklaratën agjencia.
Takimi i NSC-së u mbajt pasi Pheniani gjuajti raketën e cila "duket se ka fluturuar mbi Japoni".
Më herët, Ministria e Mbrojtjes e Japonisë tha se Koreja e Veriut ka lëshuar "atë që duket të jetë një raketë balistike, e cila mund të fluturojë në drejtim të prefekturave Aomori dhe Hokkaido në Japoninë veriore" dhe paralajmëroi njerëzit që të kërkojnë strehim.
Më vonë, ministria tha se raketa tashmë ka rënë.
Presidenti Yoon tha se Pheniani shkeli rezolutat e Këshillit të Sigurimit të OKB-së, duke urdhëruar veprime të forta.
Yoon gjithashtu udhëzoi zyrtarët e tij të sigurisë për konsultime të menjëhershme me SHBA-në dhe Japoninë dhe tha se veprime të tilla do të forconin bashkëpunimin midis Seulit, Washingtonit dhe Tokios.
"Siç thashë në 1 tetor, Ditën e Forcave të Armatosura, provokime të tilla të pamatura bërthamore do të përballen me një përgjigje të vendosur nga ushtria dhe aleatët tanë, si dhe nga komuniteti ndërkombëtar", tha Yoon.
Të shtunën e kaluar, Koreja e Veriut lëshoi gjithashtu dy raketa balistike me rreze të shkurtër veprimi në Detin Lindor.
Përshkallëzimi i tensioneve në Korenë e Veriut mendohet të jetë në përgjigje të një stërvitjeje të përbashkët ushtarake nga Jugu, SHBA dhe Japonia në Detin Lindor.
Të enjten e kaluar, nënpresidentja e SHBA-së, Kamala Harris, tha se SHBA do të bëjë "çdo gjë" në fuqinë e saj për të siguruar angazhimin e saj të sigurisë ndaj aleatit të saj aziatik gjatë një vizite njëditore në Korenë e Jugut.
Para vizitës së saj, të mërkurën e kaluar Koreja e Veriut lëshoi gjithashtu dy raketa balistike me rreze të shkurtër veprimi në Detin Lindor.
Koreja e Veriut e shpalli veten një shtet me armë bërthamore pasi miratoi ligjin e ri, duke autorizuar forcat e saj të armatosura të përdorin armë bërthamore nëse një sulm me armë bërthamore ose armë të tjera të shkatërrimit në masë fillon ose bëhet i pashmangshëm.
Tensioni në gadishull u rrit në vitin 2020 kur Koreja e Veriut sulmoi dhe shkatërroi zyrën e ndërlidhjes ndërkoreane përgjatë kufirit. Seuli ka kërcënuar një përgjigje të fortë nëse Pheniani "përkeqëson më tej situatën".
Megjithatë, tensionet u rritën më tej vitin e kaluar kur Seuli dhe Pheniani shtuan stërvitjet ushtarake për të treguar fuqinë e tyre.
