Udhëheqësi i seperatistëve katalonjas Puigdemont arrestohet në Sardenjë

Ish-presidenti i Katalonjës, Carles Puigdemont, i cili u largua nga Spanja pas një përpjekjeje të dështuar për të fituar pavarësinë, u arrestua në ishullin italian të Sardenjës, njoftoi të enjten avokati i tij Gonzalo Boye, transmeton Anadolu Agency (AA).

Boye njoftoi në Twitter se Puigdemont u arrestua pas mbërritjes në Sardenjë, ku po udhëtonte në rolin e anëtarit të Parlamentit Evropian (MEP).

Ish-presidenti i Katalonjës në tetor 2017 u arratis në Belgjikë për t'i ikur arrestimit ndërsa më pas shkoi në Gjermani, ku u arrestua në mars 2018 dhe më pas u lirua në prill.

Atë vit, Gjykata Supreme e Spanjës lëshoi ​​një urdhër ndërkombëtar për arrestimin e tij me akuzat e rebelimit dhe keqpërdorimit të fondeve publike, por e anuloi atë në korrik 2018.

Parlamenti i Katalonjës shpalli pavarësinë në bazë të referendumit për pavarësinë më 1 tetor 2017, megjithëse qeveria spanjolle e shpalli referendumin antikushtetues.

Puigdemont udhëhoqi një përpjekje të dështuar për të shkëputur provincën më të pasur të Spanjës dhe për ta bërë atë të pavarur.