Rania R.a. Abushamala
06 Janar 2025•Përditësim: 07 Janar 2025
Ushtria izraelite ka paralajmëruar personelin e saj që udhëton jashtë vendit për rrezikun e arrestimit, pasi një ushtar u arratis nga Brazili teksa po hetohej për krime të mundshme lufte në Gaza, transmeton Anadolu.
Sipas gazetës izraelite "Haaretz", kjo ndodhi për shkak se organizatat e të drejtave të njeriut gjurmojnë ushtarët dhe ngrenë padi ligjore kundër tyre për pjesëmarrje në luftën e vazhdueshme në enklavën palestineze. Në raport thuhet se paralajmërimi i ushtrisë posaçërisht ka të bëjë me rezervistët, pasi personeli aktiv ushtarak nuk mund të udhëtojë jashtë vendit pa miratimin paraprak.
Gjithashtu theksohet se Izraeli është në kontakt me vendet ku janë paraqitur ankesa kundër ushtarëve të tij dhe se bëhen përpjekje për të parandaluar hetimet që mund të çojnë në arrestime. Mediat izraelite raportuan më herët se një ushtar i akuzuar për kryerjen e krimeve të luftës në Gaza ishte arratisur nga Brazili, ku autoritetet po bënin presion për një hetim mbi veprimet e tij.
Kjo erdhi pas një ankese të paraqitur nga Fondacioni Hind Rajab (HRF), një organizatë me bazë në Belgjikë që angazhohet për drejtësi për viktimat palestineze. Ankesa përfshin mbi 500 faqe prova, si dhe video, të dhëna për vendndodhjen dhe inteligjencë me burim të hapur që ndërlidh ushtarin me shkatërrimin në Gaza.
Pavarësisht një urdhri gjyqësor, ushtari rezervist izraelit që ishte në Brazil si turist, arriti të arratisej nga vendi, njoftoi KAN. Detajet se si ai i shpëtoi arrestimit mbeten të paqarta. Në një deklaratë, HRF dënoi arratisjen e ushtarit, duke akuzuar Izraelin për orkestrimin e largimit të tij për të penguar drejtësinë.
Organizata tha më herët se kishte "verifikuar informacionin se Izraeli po përpiqet menjëherë të kontrabandojë kriminelin e dyshuar izraelit të luftës Yuval Vagdani jashtë Brazilit për shkak të një urdhri të gjykatës braziliane që policia të marrë masa hetimore kundër tij".
Arratisja e rezervistit izraelit vjen pas incidenteve të ngjashme që përfshijnë ushtarë izraelitë jashtë vendit. Muajin e kaluar, një grup pro-palestinez në Sri Lanka bëri thirrje për arrestimin e një ushtari izraelit në detyrë aktive, i cili ndodhej në atë vend, duke nxitur evakuimin e tij të menjëhershëm nga autoritetet izraelite, sipas "Channel 12".
Ushtria izraelite ka vazhduar luftën gjenocidale në Rripin e Gazës duke vrarë më shumë se 45.800 palestinezë, kryesisht gra dhe fëmijë, që nga sulmi ndërkufitar i grupit palestinez Hamas më 7 tetor 2023, pavarësisht një rezolute të Këshillit të Sigurimit të OKB-së që bën thirrje për armëpushim të menjëhershëm.
Në nëntor, Gjykata Ndërkombëtare Penale (GJNP) lëshoi urdhër-arreste për kryeministrin izraelit, Benjamin Netanyahu dhe ish-ministrin e Mbrojtjes, Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me padi për gjenocid në Gjykatën Ndërkombëtare të Drejtësisë (GJND) për luftën e tij vdekjeprurëse në enklavë.
