"Civaka navneteweyî li dijî referandumê nîne, bertek û niqaş li ser roja wê ye"

HEWLÊR

Berpirsê Peywendiyên Derva yê Herêma Kurdistana Iraqê (HKI) Felah Mistefa daxuyand ku beriya ew biryara referandumê bidin wan agahî daye Serokwezîrê Iraqê Heyder Ebadî û rayedarên din.

Felah Mistefa li Hewlêrê civîneke çapemeniyê li dar xist û der barê niqaş û bertekên referanduma ku wê di 25ê îlonê de çêbibe de axîvî.

Mistefa destnîşan kir ku civaka navneteweyî bi eşkere li dijî referandumê nîne, bertek û niqaş jî ber roja referandumê de ne.

Mistefa got Serokwezîrê Iraqê Ebadî bi awayekî hişk dibeje ku referandum dijî zagonê ye û ewê encama wê qebûl nekin û wîha dewam kir: "Referandum ji bo her kesê ku şika wî ji Herêma Kurdistanê heye bersivek e. Ji ber vê beriya her tiştî ji Ebadî û rayedarên li Bexdayê ne re der barê referandumê de agahî hat dayîn."

Ji bo bertek û çareseriya pirsgirêkan Mistefa got bi biryara Lijneya Bilind a Referandumê wê heyetek bê avakirin û ev heyet wê ewil here Bexdayê û paşê jî wê here welatên cînar û hevdîtinan pêk bîne.

Serokwezîrê Iraqê Ebadî roja çarşemê daxuyaniyek dabû û gotibû referanduma HKIyê dijî zagonê ye û ji ber wê ewê encama vê referandumê qebûl nekin.

Serokê HKIyê Mesud Barzanî di 7ê hezîranê de daxuyandibû ku referanduma serxwebûnê wê di 25ê Îlona 2017an de were kirin.