یڵدرم: "به‌ره‌نگاربوونه‌وه‌ی تیرۆر خه‌باتی مانه‌وه‌ و بوونی توركیایه‌"

ئه‌نقه‌ره‌ - AA
سه‌رۆكوه‌زیرانی توركیا، بینالی یڵدرم له‌ 114مین كۆبوونه‌وه‌ی سه‌رۆك لقه‌كانی ئاك پارتیدا گوتارێكی پێشكه‌ش كرد.
له‌ گوتاره‌كه‌یدا، یڵدرم باسی له‌وه‌ كرد كه‌ به‌ره‌نگاربوونه‌وه‌ی تیرۆر، خه‌باتی مانه‌وه‌ و بوونی توركیایه‌ و، گوتی: "به‌ره‌نگاربوونه‌وه‌ی تیرۆر، جه‌نگێكی گه‌وره‌یه‌ ده‌كرێت له‌ پێناو هێشتنه‌وه‌ی یه‌كێتیی، پێكه‌وه‌ژیان و برایه‌تی توركیا بۆ هه‌میشه‌. هه‌موو كات پارێزگاریی له‌ یه‌كێتیی و یه‌كبوونمان ده‌كه‌ین، هه‌رگیز رێگه‌ ناده‌ین توركیا بكه‌وێته‌ ژێر هه‌ژموونی تیرۆره‌وه‌".
سه‌رۆكوه‌زیرانی توركیا، بینالی یڵدرم گوتیشی: "ئیدی توركیا وڵاتێك نییه‌ به‌ پیلانگێڕی تاریك و كه‌مینه‌ لێگرتن ده‌ستی به‌سه‌ردا بگیرێت، ئیدی توركیا وڵاتیك نییه‌ له‌لایه‌ن تۆڕەكانی شه‌ڕه‌وه‌ دابه‌ش بكرێت. هه‌ركاتێک یه‌كبین و به‌یه‌كه‌وه‌بین، دڵمان له‌ پێناو توركیادا لێبدات، ئه‌وا كه‌س ناتوانێت به‌ر به‌ گوڕ و تینمان بگرێت".
- "تیرۆر، به‌ڵای سه‌ر جیهانه‌"
هاوكات سه‌رۆكوه‌زیرانی توركیا، بینالی یڵدرم باسی له‌ هێرشه‌ تیرۆریستییه‌كانی توركیا و ئه‌ڵمانیا كرد و رایگه‌یاند: "هەڵبەت ئەم هێرشە تیرۆریستیانە نیشانی دەدەن کە لە بەرامبەر تیرۆردا هیچ وڵاتێک ناتوانێت بڵێت ناوچەکەمان ئاسایشی پارێزراوە. تیرۆر بەڵای جیهانە. هەر بۆیە ئەو هێرشانەی دەکرێنە سەر تورکیا تەنیا بە کێشەی ئەو وڵاتە بزانرێت، هەڵەیەکی گەورەیە. ئەوانەی وادەزانن کە گرووپە تیرۆریستیەکانی ناو عێراق و سووریا تەنیا هەڕەشەن بۆسەر تورکیا ئەوا هەڵە دەکەن. تیرۆر کێشەی هاوبەشی جیهانە. دەبێت کۆمەڵگەی نێودەوڵەتی لەبەرامبەر تیرۆردا دەستبەرداری فرەهەڵوێست بێت و یەک هەڵوێستی بنوێنن".
- "گۆڕانكاری شێوەی حوکمڕانی كۆن بووه‌. له‌ 1923دا ئه‌و بابه‌ته‌ ته‌واوبووه‌"
سه‌باره‌ت به‌و بانگه‌شانه‌ی باس له‌ گۆڕینی شێوەی حوکمڕانی ده‌كه‌ن له‌ڕێگه‌ی داواكاری بۆ گۆڕینی ده‌ستوور، سه‌رۆكوه‌زیرانی توركیا، بینالی یڵدرم گوتی: "ئه‌وه‌نده‌مان ئه‌وه‌ باس كرد، سوڵتانی كه‌ڕ بیستی. هه‌مووان تێگه‌یشتن، به‌ڵام به‌ڕێز كڵچدارئۆغڵو نایه‌وێت به‌هیچ شێوه‌یه‌ك تێبگات. به‌ڕێز كڵچدارئۆغڵو، بەڕێز كه‌مال، شێوازی حوکمڕانی توركیا دیاره‌، كۆمارییه‌. له‌ 1923دا تێکۆشاین و شه‌ڕی سه‌ربه‌خۆییمان برده‌وه‌، شێوەی حوکمڕانیی و ناوەکەشمان گۆڕی و كرد به‌ كۆماری. چی ده‌گۆڕێت؟ گۆڕانكاری شێوەی حوکمڕانی كۆن بووه‌. له‌ 1923دا ئه‌و بابه‌ته‌ ته‌واوبووه‌. ئێستا ئیدی باس له‌ سیستەمێكی حوکمڕانی ده‌كه‌ین كه‌ پێویستییه‌كانمان ده‌سته‌به‌ر بكات، توانای جێبه‌جێكردن و سه‌قامگیری بكاته‌ بنه‌ما".