هەرێمی کوردستان.. 566 کەسی دیکە تووشی ڤایرۆسی کۆرۆنا بوون

هەولێر AA

وەزارەتی تەندروستیی هەرێمی کوردستان ئاماری 24 کاتژمێری رابردووی تایبەت بە ڤایرۆسی کۆرۆنای نوێ (COVID-19)، بڵاوکردەوە.

بەپێی راگەیەندراوێکی وەزارەتی تەندروستیی هەرێمی کوردستان، 566 تووشبووی نوێ لە پارێزگاکانی هەرێم تۆمارکراوە کە بەرزترین ژمارەیان لە پارێزگای هەولێرە و 389 کەسن، دوای ئەو پارێزگای دهۆک پلەی دووەمی گرتووە بە 69 تووشبووی نوێ و لە پارێزگای سلێمانی-یش 54 کەس و گەرمیان 27 تووشبوو، تۆمارکراوە.

هەر بەپێی راگەیەندراوەکەی وەزارەتی تەندروستیی هەرێمی کوردستان لە میانی 24 کاتژمێری رابردوودا، 164 تووشبووی کۆرۆنا چاکبوونەتەوە و 16 کەسیش بەهۆی ڤایرۆسەکەوە گیانیان لەدەستداوە.

بەپێی ئاماری وەزارەتی تەندروستیی تاوەکو ئێستا، 18 هەزار و 766 کەس تووشی ڤایرۆسی کۆرۆنای نوێ بوون، لەو ژمارەیەیش 10 هەزار و 644 کەسیان چاکبوونەتەوە و 686 کەسیش گیانیان لەدەستداوە.

ئێستا حەوت هەزار و 463 تووشبوو ماون کە لەژێر وەرگرتنی چارەسەردان.