لێدوانی نوێی ئەمریکا لەبارەی سووریا لە ئەنجوومەنی ئاسایش

نەتەوە یەکگرتووەکان -AA

نوێنەری ھەمیشەیی ئەمریکا لە نەتەوە یەکگرتووەکان، نیکی ھالی رایگەیاند کە ئەگەر رژێمی سووریا دووبارە چەکی کیمیایی بەکاربھێنێتەوە ئەوا ئەمریکا ئامادەیە بۆ ھێرشکردن.

ئەنجوومەنی ئاسایشی نەتەوە یەکگرتووەکان لەسەر داوای رووسیا بەھۆی ھێرشی ئاسمانی ئەمریکا، بەریتانیا و فەڕەنسا بۆ سەر رژێمی بەشار ئەسەد بەپەلە کۆبووەوە.

لە کۆبوونەوەکەدا نوێنەری ھەمیشەیی ئەمریکا لە نەتەوە یەکگرتووەکان نیکی ھالی رایگەیاند کە ئەمریکا، بەریتاینا و فەڕەنسا بەمەبەستی رێگری لە دووبارە بەکارھێنانەوەی چەکی کیمیایی لە سووریا ھێرشیان کردووەتە سەر ئەو وڵاتە، نەک بەمەبەستی نیشاندانی ھێز و تۆڵەسەندنەوە و سزادان.

ھالی راشیگەیاند کە چەندین جار چانسی دیپلۆماسیان لەمبارەیەوە بەکارھێناوە، بەڵام رووسیا شەش جار مافی ڤیتۆی لە ئەنجوومەنی ئاسایشی نەتەوە یەکگرتووەکان لەسەر پرسی بەکارھێنانی چەکی کیمیایی لە سووریا بەکارھێناوە.
گوتیشی: "ستراتیژی ئێمە لەبارەی سووریا نەگۆڕاوە.بەڵام رژێمی سووریا درێژەی بە بەکارھێنانی چەکی کیمیایی دا و ئەمەش جووڵەی بە ئێمە کرد. بەیانی ئەمڕۆ قسەم لەگەڵ سەرۆک ترەمپ کرد و ئەگەر رژێمی سووریا دووبارە چەکی کیمیایی بەکاربھێنێتەوە ئەوا ئەمریکا ئامادەیە بۆ پێکانی ئامانجەکان. ئەگەر ھێڵی سوور ببەزێنرێت ئەوا سەرۆکمان ئەمە جێبەجێ دەکات".

لەلایەکی دیکەوه‌، نوێنەری ھەمیشەیی رووسیا لە نەتەوە یەکگرتووەکان، ڤاسیلی نیبێنزیا رایگەیاند کە ئەمریکا، بەریتانیا و فەڕەنسا بە گاڵتەجارییەوە بڕیاری ھێرشکردنیان بۆ سەر سووریا داوە. گوتیشی: "رووسیا بە توندی ئیدانەی ھێرشکردنە سەر سووریا دەکات. ئەمریکا بە ئەنجامدانی ئەو کارانە، دۆخی رووخێنراوی ئێستای سووریا خراپتر دەکات".

نیبێنزیا ئاشکراشی کرد کە ئەمریکا، فەڕەنسا و بەریتانیا بە شێوەیەکی "نایاسایی" ئۆپەراسیۆنی سەربازیان بۆ سەر سووریا ئەنجامداوە و، بەم ھۆیەوەشه‌وه‌ ئەمریکا و ھاوپەیمانانی رێککەوتنامەی نەتەوە یەکگرتووەکان و یاساکانی نێودەوڵەتیان پێشێڵکردووە.