هەولێر.. ئاماده‌كاریی بۆ ریفراندۆم لە بنکەکانی دەنگدان

هه‌ولێر - AA
سه‌رجه‌م كه‌ره‌سته‌كان لە سندوق، مه‌ره‌كه‌ب، كابینه‌ی ده‌نگدان، كارتی ده‌نگدان و پێویستییه‌كانی دیكه‌ ده‌گه‌یه‌نرێنه‌ بنكه‌كان.

له‌نێو یه‌كێك له‌ بنكه‌كانی ده‌نگدان له‌ شاری هه‌ولێر چه‌ندین كارمه‌ندی كۆمیسیۆن سه‌رقاڵی دانانی كابینه‌كانی ده‌نگدان و گواستنه‌وه‌ و رێكخستنی سندوقه‌كان بوون، له‌سه‌ر ئه‌و مه‌ره‌كه‌به‌شی كه‌ بڕیاره‌ بۆ ده‌نگدان به‌كاربهێنرێت به‌ زمانی كوردی نووسرابوو.

لێره‌ له‌ بنكه‌ی ژماره‌ 206 له‌ ئاماده‌یی بارزانی نەمر له‌ گه‌ڕه‌كی ئازادی شاره‌كه‌، كارمه‌ندان ته‌نانه‌ت شریتی كۆمیسیۆن بۆ رێكخستنی ریزه‌كانیشیان لێدابوو، پاش لێبوونه‌وه‌ له‌ سه‌رجه‌م ئاماده‌كارییه‌كان ئه‌وانیش لێ بوونه‌وه‌ و به‌ روویه‌كی خۆشه‌وه‌ باسییان له‌ پێشوازیكردن له‌ ده‌نگده‌ران ده‌كرد.

كۆمیسیۆنی باڵای سه‌ربه‌خۆی هه‌ڵبژاردن و راپرسی له‌ هه‌رێمی كوردستان سه‌رجه‌م ئاماده‌كارییه‌كانی بۆ ئه‌نجامدانی راپرسی كه‌ بڕیاره‌ سبه‌ی دووشه‌ممه‌ 25ی ئه‌یلوول له‌ هه‌رێمی كوردستان و ناوچه‌ كێشه‌ له‌سه‌ره‌كان به‌ڕێوه‌بچێت ته‌واوكردووه‌، ئه‌مڕۆ پێویستییه‌كانی ده‌نگدان و كه‌لوپه‌ل و كه‌ره‌سته‌كانی پێویست گه‌یشتنه‌ ئه‌و بنكه‌ و قوتابخانانه‌ی كه‌ ده‌نگیان لێ ده‌درێت.

به‌ڕێوه‌به‌ری بنكه‌ی 206ی ئاماده‌یی بارزانی نه‌مر له‌ شاری هه‌ولێر، سۆران شه‌هاب كه‌ بنكه‌كه‌ی شه‌ش وێستگه‌ی ده‌نگدانی لێییه‌ له‌ لێدوانێكدا بۆ ئاژانسی ئانادۆڵو باسی له‌ ئاماده‌كارییه‌كان كرد بۆ رۆژی راپرسی و گوتی: "سه‌رجه‌م ئاماده‌كارییه‌كانمان تا نیوه‌ڕۆی ئه‌مڕۆ ته‌واوده‌بن، هه‌موو كه‌لوپه‌ل و پێویستییه‌كانمان به‌ زیاده‌وه‌ پێگه‌یشتووه‌، له‌م بنكه‌یه‌ی ئێمه‌ شه‌ش وێستگه‌ی ده‌نگدان هه‌یه‌ كه‌ هه‌ر وێستگه‌یه‌ك 500 ده‌نگده‌ر له‌ خۆ ده‌گرێت".

گوتیشی: "ئێستا به‌ ته‌واوه‌تی ئاماده‌یین بۆ پێشوازیكردن له‌ ده‌نگده‌ران و سبه‌ی كاتژمێر هه‌شت بنكه‌كه‌مان هاوشێوه‌ی بنكه‌كانی دیكه‌ی ده‌نگدان به‌ رووی ده‌نگده‌راندا ده‌كرێته‌وه‌، جگه‌ له‌و سێ هه‌زار ده‌نگده‌ره‌ی كه‌ ناویان له‌م بنكه‌یه‌ی ئێمه‌ هه‌یه‌ كارمه‌ندانی وێستگه‌كه‌ و ئاسایش و پۆلیسی پاراستنی ئه‌م بنكه‌یه‌ش هه‌ر لێره‌ ده‌نگده‌ده‌ن، بۆیه‌ له‌ رووی پاراستنی سه‌لامه‌تی گیانی هاووڵاتییانیشه‌وه‌ له‌ رووی ئه‌منییه‌وه‌ پۆلیس و ئاسایش دابینكراون".

بڕیاره‌ سبه‌ی دووشەممە هه‌رێمی كوردستان و ناوچه‌ كێشه‌ له‌سه‌ره‌كان ده‌نگی خۆیان بۆ جیابوونه‌وه‌ی كوردستان له‌ عێراق بده‌ن، سه‌رباری ناكۆكییه‌ ناوخۆییه‌كان و فشاره‌ ده‌ره‌كییه‌كان پێده‌چێت ئه‌م ئاماده‌كارییانه‌ به‌ته‌واوه‌تی ئه‌وه‌ یه‌كلایی بكاته‌وه‌ كه‌ هه‌رێم و سه‌ركردایه‌تییه‌كه‌ی سوورن له‌سه‌ر ئه‌وه‌ی سبه‌ی ریفراندۆم بكرێت.

رۆژی 23 ی ئه‌م مانگه‌ دوا واده‌ بوو كه‌ كۆمیسیۆنی باڵای سه‌ربه‌خۆی هه‌ڵبژاردن و راپرسی له‌ هه‌رێمی كوردستان بۆ راگرتنی بانگه‌شه‌ی ریفراندۆم كه‌ بڕیاره‌ سبەی دووشەممە 25ی ئه‌یلوول به‌ڕێوه‌بچێت و ئه‌م بڕیاره‌ له‌ حه‌وتی حوزه‌یرانی ئه‌مساڵ له‌ لایه‌ن زۆرینه‌ی حزبه‌ سیاسییه‌كانی هه‌رێمه‌وه‌ ده‌رچوو و دواتریش له‌ چه‌ند رۆژی رابردوو له‌ پاش كاراكردنه‌وه‌ی په‌رله‌مانی كوردستان یه‌كه‌م دانیشتنی بۆ ئه‌و مه‌به‌سته‌ی كۆمیسیۆن رابسپێرێت بۆ ئه‌نجامدانی راپرسی ته‌رخانكرا.