وەڵامی ئەمریکا لەبارەی تۆمەتەکانی ئێران

نیویۆرک - AA

نوێنەری ھەمیشەیی ئەمریکا لە نەتەوە یەکگرتووەکان، نیکی ھالی لەبارەی پەیوەندی ئەمریکا بە ھێرشە چەکدارییەکەی سەر رێورەسمێکی سەربازیی لە ئێران گوتی: "(روحانی) ھەروەکو چۆن دەیەوێ دەتوانێ تۆمەتبارمان بکات. ئەوەی کە پێویستە بیکات تەنھا ئەوەیە سەیری ئاوێنە بکات".

ھالی لە لێدوانێکیدا بۆ کەناڵی CNN، گشت ئەو تۆمەتانەی سەرکۆماری ئێران، حەسەن رووحانی کە ئاراستەی ئەمریکای کردووە، رەتکردەوە.

ھالی لە لێدوانەکەیدا بانگەشەی ئەوەی کرد کە گەلی ئێران رژاونەتە سەر شەقامەکان بۆ پرۆتێستۆکردنی حکوومەت، گشت ئەو پارانەی دەچێتە تاران راستەوخۆ بۆ سوپا دەگوازرێتەوە و ماوەیەکی درێژە گەلی ئێران لە ژێر گوشار دایە.

ھالی وەڵامی ئەو تۆمەتانەشی دایەوە کە گوایە ئەمریکا لە پشت ھێرشەکەی شاری ئەھوازی ئێران بووە.

ھالی گوتیشی: "(رووحانی) پێویستە سەیری دەوروپشتی خۆی بکات بۆ ئەوەی بزانێ ئەو ھێرشە لە کام لایەنەوە ھاتووە. ھەروەکو چۆن دەیەوێ دەتوانێ تۆمەتبارمان بکات. ئەوەی کە پێویستە بیکات تەنھا ئەوەیە سەیری ئاوێنە بکات".

نیکی ھالی ئاشکراشی کرد کە ئەمریکا نە لە ئێران نە لە ھیچ شوێنێکی دیکە ھەوڵی گۆڕینی رژێمی نەداوە.

رۆژی شەممە، ھێرشێکی تیرۆریستی کرایە سەر رێوڕەسمێکی سەربازی کە لە ساڵرۆژی جەنگی عێراق - ئێران لە شاری ئەھوازی سازکرابوو، لە ھێرشەکەدا ٢٥ کەس کوژران و ٥٣ کەسی دیکەش برینداربوون.