په‌يامى سه‌رۆكى هه‌رێمى كوردستان له‌ يادى رۆژنامه‌گه‌ريى كورديدا

ھەولێر - AA

سەرۆکی ھەرێمی کوردستان، نێچیرڤان بارزانی بە بۆنەی ١٢٢ھەمین ساڵیادی رۆژژنامەگەریی کوردی و دەرچوونی یەکەم ژمارەی رۆژنامەی کوردستان کە ھاوکاتە لەگەڵ ٢٢ ھەمین ساڵیادی دامەزراندنی سەندیکای رۆژنامەنووسانی کوردستان، لە پەیامێکدا پیرۆزبایی لە سەرجەم رۆژنامەنووسانی کوردستان و سەندیکای رۆژنامەنووسانی کوردستان کرد.

لە پەیامەکەی نێچیرڤان بارزانی ھاتووە: "بە بۆنەی سەد و بیست و دووەمین ساڵیادی رۆژنامەگەریی کوردی و دەرچوونی یەکەم ژمارەی رۆژنامەی کوردستان ـ ی میر میقداد بەدرخانی رەوانشادەوە کە ھاوکاتە لەگەڵ بیست و دووەمین ساڵیادی دامەزراندنی سەندیکای رۆژنامەنووسانی کوردستان، پیرۆزباییەکی گەرم لە سەرجەم رۆژنامەنووسانی کوردستان دەکەم و ھیوای سەرکەوتن و پێشکەوتن بۆ سەرجەم رۆژنامەنووسان و سەندیکاکەیان دەخوازم".

سەرۆکی ھەرێمی کوردستان رایگەیاندووە: "ئەم ساڵ کە ئەو یادە دەکەینەوە، کوردستان و جیھان لەبەردەم ھەڕەشەی پەتای کۆرۆنا و دۆخێکی نالەباردایە، رۆڵی رۆژنامەنووسان و میدیاکاران لە بڵاوکردنەوەی ھۆشیاریی تەندروستی و خۆپارێزی لەو پەتایە و ھاندانی ھاووڵاتییان بۆ پابەندی بە رێنمایییەکانەوە، رۆڵێکی کاریگەر و بەرچاو بوو، بە رێزەوە دەینرخێنین، ئومێدەوارین ھەرچی زووترە ئەو بەڵایە لە یەخەی مرۆڤایەتی ببێتەوە و ژیان لە کوردستان و جیھان ئاسایی بێتەوە".

لە بەشێکی دیکەی پەیامەکەی سەرۆکی ھەرێمی کوردستان، نێچیرڤان بارزانی ھاتووە: "لەم یادەدا وەک ھەمیشە پشتیوانیی خۆمان بۆ رۆژنامەنووسان و ئازادیی کاری رۆژنامەگەری دووپات دەکەینەوە، لە رۆژنامەنووسانیش چاوەڕوانین ھەمووان بەرپرسیارانە و پیشەیییانە، مامەڵە لەگەڵ پرس و بابەتەکان بکەن، ھەمیشە ئەو بڵندگۆیە بن کە ھۆشیاری و زانیاریی راست و دروست و ھاوسەنگ دەگوازنەوە و پاراستنی ئاشتەواییی کۆمەڵایەتی و سەقامگیریی سیاسی و بەرژەوەندییە باڵاکانی گەل و وڵاتەکەیان لەبەرچاو دەگرن".

نێچیرڤان بارزانی سڵاوی بۆ یادی رۆژنامەنووسانی شەھید و ئەو رۆژنامەنووسە پێشەنگانە ناردووە کە ژیانی خۆیان بۆ گەیاندنی راستی و پێشخستنی رۆژنامەگەریی کوردستان تەرخان کردووە.

سەرۆکی ھەرێمی کوردستان لە کۆتاییدا وێڕایی پیرۆزبایی لە سەرجەم رۆژنامەنووسان، ھیوای خواستووە کە ساڵی داھاتوو لە دۆخێکی لەبار و ئاسوودەدا یادی ئەم رۆژە و بۆنەکانی دیکە بکرێنەوە.