سوپای عێراق:"بە میكانیزمێكی رێكخراو لە ناوەندەكانی هەماهەنگیی دەست بەكاركردن دەكەین"

بەغدا ــ AA

گوتەبێژی فەرماندەیی ئۆپەراسیۆنە هاوبەشەكانی عێراق، لیوا تەحسین خەفاجی رایگەیاند كە بۆ كاركردن و جێبەجێكردنی ئەركەكان بە راستەوخۆ لە ناوەندەكانی هەماهەنگیی لەگەڵ پێشمەرگە، چاوەڕوانی رێككەوتنی كۆتایی و دۆزینەوەی میكانیزمێكی رێكخراو دەكەن.

لیوا تەحسین خەفاجی لە لێدوانێكی رۆژنامەوانییدا گوتی: "تا رێككەوتنی كۆتایی نەكرێت و میكانزمێكی رێكخراو نەدۆزرێتەوە، ئەوا راستەوخۆ ئەركەكان لە ناوەندەكانی هەماهەنگیی لەگەڵ پێشمەرگە لە مەخموور، دیالە، نەینەوا و كەركووك جێبەجێ ناكرێت و كاركردنیش تیایاندا ئەنجام نادرێت".

گوتیشی: "گفتوگۆكان لەگەڵ پێشمەرگە بەردەوامە، بە ئامانجی دۆزینەوەی میكانیزمێكی رێكخراو لە چوار لق و دوو ناوەندی سەرەكی هەمانگیی لە بەغدا و هەولێر".

پێشتر گوتەبێژی فەرماندەی گشتیی هێزە چەكدارەكانی عێراق، لیوا یەحیا رەسول رایگەیاندبوو كە سەبارەت بە ناوەندەكانی هەماهەنگیی لە سێ پارێزگا كە نوێنەرانی وەزارەتەكانی بەرگریی و ناوخۆی فیدرال و وەزارەتی پێشمەرگە تیایدا بەشداربوون، گفتوگۆكراوە.

لیوا یەحیا رەسول ئاشكراشی كردبوو كە ناوەندەكانی هەماهەنگیی، بەشەكانی ئاڵوگۆڕی زانیاریی و هەماهەنگیی بە ئامانجی راوەدوونانی تیرۆریستانی داعش لە ناوچەكانی عێراق لەخۆدەگرن.