پرۆسەی دەنگدانی گشتیی لە عێراق و ھەرێمی کوردستان دەستی پێ کرد

لە پارێزگای ھەولێر ٤٨٩ بنکە بۆ یەک ملیۆن و ١٥٩ ھەزار و ٧٥٠ دەنگدەر تەرخان کراوە کە تیایدا ھەزار و ١٤٥ چاودێری ناوخۆیی، چاودێری پڕۆسەکە دەکەن و ئەم پڕۆسەیەش لەلایەن ٤١٠ راگەیاندکارەوە رووماڵ دەکرێت.

ھاوکات ٢٩ رێکخراو خۆیان بۆ چاودێریکردنی پڕۆسەکە تۆمار کردووە و، پڕۆسەکەش لە کاتژمێری حەو تی بەیانی دەست پێ دەکات و کاتژمێر شەشی ئێوارە ناوەندەکانی دەنگدان بە رووی دەنگدەران دا دادەخرێن.

یه‌كێك له‌و بنكانه‌، قوتابخانه‌ی بارزانی نه‌مره‌ كه‌ ده‌كه‌وێته‌ سنووری بازنه‌ی سێیی هه‌ولێر و ئه‌م بنكه‌یه‌ شه‌ش وێستگه‌ی تیادایه‌ و زیاتر له‌ دوو هه‌زار ده‌نگده‌ری هه‌یه‌ و پڕۆسه‌كه‌ كاتژمێر حه‌فتی به‌یانی ده‌ستی پێ كرد و ده‌نگده‌ران چوونه‌ سه‌ر سندوقی ده‌نگدان.

لە عێراقدا ٢٤ ملیۆن و ٩٠٧ ھەزار و ٦٧٩ کەس و لە ھەرێمی کوردستانیش سێ ملیۆن و ٤٨٦ ھەزار و ٧٨٧ کەس مافی دەنگدانی ھەیە.

بە ھەرسێ پارێزگاکەی ھەرێمی کوردستان، ھەولێر و سلێمانی و دھۆک ٤٤ کورسی پەرلەمانی عێراقیان بەردەکەوێت، ١٨ کورسی سلێمانی کە بەسەر پێنج بازنەی ھەڵبژاردن دابەش بووە، ١٥ کورسی ھەولێر بەسەر چوار بازنە دابەشبوون و ١١ کورسی دھۆک-یش بەسەر سێ بازنەی ھەڵبژاردن دابەشبوون، لەگەڵ دوو کورسی کۆتای مەسیحییەکان کە یەکێکیان لە ھەولێر و ئەوی دیکەشیان لە دھۆکە.

لەم ھەڵبژاردنەدا لە سەرانسەری عێراق، سێ ھەزار و ٢٤٠ بەربژێر بەشدارن کە ٩٥٠ ئافرەت و ٧٨٩ پیاون و ژمارەکەی دیکەیش بەسەر ٢١ هاوپەیمانی و ١٠٩ پارت و قەوارەی سیاسیی دابەشبوون، سەرجەمیان کێبڕکێ دەکەن بۆ بەدەستھێنانی ٣٢٩ کورسیی پەرلەمانی عێراق.

لە کۆی ٧٥ ھەزار چاودێری ناوخۆیی و ھەزار و ٧٠٠ چاودێری نێودەوڵەتیی، ھەزار و ١٤٥یان وەک چاودێری ناوخۆییی، چاودێریی ھەڵبژاردنەکانی عێراق دەکەن.

لە کۆی ٣٢٩ کورسییەکەی ئەنجوومەنی نوێنەران، ٨٣ کورسی بۆ ئافرەت تەرخان کراوە، ھەروەھا نۆ کورسی بۆ کۆتای مەسیحی، شەبەک، سابیئەی مەندائی، ئێزدی و فەیلی تەرخان کراوە.

لەم ھەڵبژاردنەدا، سێ ھەزار و ٢٤٠ کاندید کە ٩٥٠ یان ئافرەت و ٧٨٩یان سەربەخۆن، ژمارەکەی دیکەیش بەسەر ٢١ ھاوپەیمانی و ١٠٩ پارت و قەوارەی سیاسییدا دابەش بوون.