Во Скопје се одржува годишниот самит „Жени во претприемништвото – клуч за зајакнување на економијата“

СКОПЈЕ (АА) - Во Скопје се одржува Третиот годишен самит на Националната платформа за женско претприемништво „Жени во претприемништвото – клуч за зајакнување на економијата“, јавува Анадолу.

Дводневниот самит е организиран како годишен настан на проектот „Национална платформа за женско претприемништво“, кофинансиран од Европската Унија (ЕУ).

На отворањето на самитот присуствуваа владини претставници, претставници на локалната власт, претставници од канцеларијата на ЕУ во Скопје, како и голем број жени претприемачи.

Вицепремиерот за економски прашања, Фатмир Битиќи, во своето воведно обраќање рече дека на бизнисот и на економијата им се неопходни квалитетите на жените.

Тој нагласи дека во Северна Македонија скоро половина од жените се надвор од пазарот на труд.

„Затворањето на родовиот јаз е клучно за одржливиот раст и развој на економијата. Со негово затворање ќе се искористи целосниот потенцијал за поттикнување на поразновидна и квалификувана работна сила. Оваа инклузивност не само што ја промовира социјалната правда туку и ги подобрува економската ефикасност и иновативноста“, рече Битиќи.

Министерот за економија, Крешник Бектеши, рече дека Министерството со кое тој раководи ја препознава важната улога на жените во економијата и во 2018 година има донесено Стратегија за развој на женското претприемништво.

Тој додаде дека во континуитет се зголемува бројот на компании што се основани или управувани од жени.

„Може да констатираме дека мерките за стимулирање на жените за започнување свој бизнис што Владата ги реализира секоја година, како и активностите што произлегуваат од Стратегијата за развој на женско претприемништво на Република Северна Македонија ја постигнале целта, но не се доволни“, истакна Бектеши.

Валентина Дисовска од проектот „Националната платформа на женското претприемништво“ во својот говор им се заблагодарам на сите институции и организации што ја потпишаа декларацијата за поддршка на женското претприемништво. Таа, исто така, изнесе неколку информации во врска со реализираниот проект.

„Сите заедно креиравме движење што активно работи за подобрување на условите за раст и развој. И кои се резултатите од тоа што го сработивме? Повеќе од 250 потпишани декларации, над 2.000 лица што биле на нашите настани, организирање тематски и секторски групи, над 50 состаноци со активни стејкхолдери и повеќе од 200 состаноци на локалните координаторки со сите локални заедници", нагласи Дисовска.

Исто така, таа упати барање за креирање фонд за поддршка на женското претприемништво, додавајќи дека овој фонд беше дел од Националната стратегија 2019-2023, но остана незавршен поради Ковид-кризата и другите кризи.

На отворањето на Самитот, исто така, беа доделени награди за најдобри жени претприемачи во микро, мали и средни претпријатија.