Започна функционирањето на платниот промет во „Пошта на Северна Македонија“, што ќе се одвива преку Халкбанк

СКОПЈЕ

Од денес, 1 март, започна функционирањето на платниот промет во АД „Пошта на Северна Македонија“, преку кој граѓаните ќе можат повторно да ги плаќаат своите сметки и да вршат други плаќања во готово, јавува Агенција Анадолија (АА).

Генералниот директор на АД „Пошта на Северна Македонија“, Јани Макрадули, заедно со членот на Управниот одбор на „Халкбанк“ АД Скопје, Букет Геречџи, ја посетија Поштата 1020 во Општина Карпош во Скопје, со што беше означено повторното функционирање на платниот промет во единиците на поштенската мрежа на АД „Пошта на Северна Македонија“, согласно потпишаниот договор за соработка со „Халкбанк“.

Истакнувајќи дека во еден подобар и поголем обем денес започнува функционирањето на платниот промет во „Пошта на Северна Македонија“, Макрадули рече дека провизијата е најмала и дека ќе изнесува 35 денари за плаќање на сметки и други режиски трошоци.

„Утрово само за еден час направени се веќе 500 трансакции или 92 трансакции се направени во Поштата во Ѓорче, а станува збор за почеток во којшто не сакавме да брзаме, туку стартуваме со 35 поштенски единици. Со тоа се покажа нашата заложба и нашето верување дека ова е добра работа и за граѓаните бидејќи провизиите што ги нудиме ние заедно со нашите партнери од Халкбанка се најмали“, нагласи генералниот директор Макрадули.

Макрадули, наведувајќи дека ќе придонесат за растоварување на метежот пред банките, рече дека навистина е пријатно изненаден за одличниот одзив уште од првиот ден и дека со тоа е потврдено дека „Пошта на Северна Македонија“ го нашла вистинскиот партнер во „Халкбанк“.

Членот на Управниот одбор на „Халкбанк“ АД Скопје, Букет Геречџи, потсетувајќи дека Халкбанк ја дала најдобрата понуда до „Пошта на Северна Македонија“, рече дека за краток период од два месеца ја воспоставиле целата инфраструктура.

„До минатата недела ги направивме сите тестови и ние и Пошта. Системот работи многу добро и правилно. Утрово официјално започнавме со првата трансакција. Првата трансакција е направена во Битола“, рече Геречџи.

Функционирањето на платниот промет во Поштата, во првата недела од март ќе биде достапно во повеќе избрани подружници и тоа: во Скопје 1 и Скопје 2, подружниците во Тетово, Гостивар, Кичево, Охрид, Битола, Прилеп, Кавадарци, Велес, Гевгелија, Струмица, Штип, Кочани и Куманово.

Халкбанк Скопје и АД Пошта на Северна Македонија на 30.12.2020 година потпишаа договор за соработка според кој преку „Халкбанк“ ќе се врши платниот промет на АД Пошта на Северна Македонија. Според договорот, 71 отсто од остварениот приход ќе биде наменет за државната пошта, а 29 отсто за Халкбанк.