Bojan Bednar
22 Октомври 2023•Ажурирај: 23 Октомври 2023
БЕЛГРАД (АА) - „Силно го осудуваме терористичкиот напад на Косовската полиција од 24. септември. Сите извршители мораат да бидат приведени и изведени пред лицето на правдата. Од Србија очекуваме потполна кооперација и конкретни акции во таа насока“, изјави вчера специјалниот претставник на Европската унија (ЕУ) за дијалог меѓу Белград и Приштина, известува Анадолу.
Лајчак по разговорот со претседателот на Србија Александар Вучиќ, на кој присуствуваа и специјалниот пратеник на САД за Западен Балкан, Габриел Ескобар, советниците за надворешна и безбедносна политика на претседателите на Франција и канцеларот на Германија, Емануел Боно и Јенс Плетнер, како и дипломатскиот советник на премиерката на Италија, Франческо Тало, на новинарите им изјави дека ЕУ и САД се загрижени поради тековната негативна траекторија во процесот на нормализација, која е директно поврзана со европскиот пат на Србија и Косово.
Тој додаде дека целта на посетата била да се разговара за тоа како да се направи конкретно поместување во имплементацијата на договорот на патот кон нормализација и деескалација по неодамнешните случувања на Косово.
„Лидерите се одговорни пред своите граѓани и очекуваме одговорна и одмерена комуникација во јавноста“, истакна Лајчак.
Тој нагласи дека и Србија и Косово мораат да го направат својот дел од работата за деескалација и нормализација на меѓусебните односи, и дека тоа му било соопштено на Вучиќ.
„Очекуваме и Србија и Косово да почнат да ги исполнуваат обврските преземени со новиот договор од февруари и март, но и обврските од претходните договори“, наведе Лајчак.
Тој рече дека дијалогот меѓу Белград и Приштина ќе биде во агендата на состанокот на министрите за надворешни работи на земјите на ЕУ закажан за понеделник, а во текот на следната недела за тоа ќе разговараат и лидерите на земјите на ЕУ на Европскиот совет.
„За Србија и Косово нема европска иднина без нормализација на односите и имплементација на договор. Сакаме да видиме просперитетен и стабилен Западен Балкан, поради што дијалогот е од круцијално значење“, заклучи Лајчак.
