Народниот правобранител на РСМ: Регистрирани проблеми во однос на примањата на надоместокот за помош

СКОПЈЕ

Институцијата Народен правобранител на Република Северна Македонија информираше дека во последните месеци во земјата се регистрирани проблеми во однос на примањата на надоместокот за помош и нега од друго лице и дека овој проблем е појавен за време на пандемијата, јавува Агенција Анадолија (АА).

Драги Целевски, државен советник во институцијата Народен правобранител, денеска одржа онлајн брифинг на кој информираше за причината на проблемите со кои се соочуваат граѓаните во однос на надоместокот за помош и нега од друго лице.

Истакнувајќи дека проблемот е во тоа што граѓаните не можат да обезбедат конзилијарно мислење од лекарските комисии, Целевски рече дека комисиите не можат да се состанат поради постојната состојба со пандемијата и ангажманот на сите лекари во рамките на справувањето со Ковид-19.

„Од тие причини Народниот правобранител до центрите за социјална работа, односно до Меѓуопштинскиот центар за социјална работа на Град Скопје достави едно укажување дека центрите се должни да ги примаат барањата од граѓаните, а документацијата ќе биде дополнително доставена“, нагласи државниот советник Целевски.

Целевски, истакнувајќи дека за состојбата е информирана и Владата, рече дека Министерството за труд и социјална политика и Министерството за здравство се надлежни за решавање на овој проблем.

„Министерството за труд и социјална политика, бидејќи социјалната заштита е во доменот и делокругот на ова министерство, и второ, до Министерството за здравство бидејќи комисиите кои одлучуваат и ги носат наодите и мислењата во врска со конзилијарно мислење се во доменот на надлежноста на Министерството за здравство“, нагласи Целевски.

Тој, исто така, на брифингот информираше дека во согласност со Законот за здравствена заштита во земјата има вкупно 15 комисии кои одлучуваат и носат наод и мислење за здравствената состојба на граѓанин.