Собир во Скопје за сеќавање на жртвите од пожарот во Кочани

СКОПЈЕ (АА) – По повод шест месеци од трагедијата со пожарот во Кочани, во Скопје се одржа собир за сеќавање на жртвите, јавува Анадолу.

Во организација на движењето „Кој е следен?“ голем број граѓани се собраа на главниот плоштад во градот, каде што запалија свеќи и ги вклучија светлата на своите телефони во чест на жртвите.

На маса поставена на плоштадот беа напишани пораки за поддршка на семејствата на оние што ги загубија животите во трагедијата.

Собирот започна во 20:16 часот, симболизирајќи го датумот 16 март кога се случи трагедијата. Покрај тоа, учесниците стоеја во молк 16 минути, како знак на почит и сеќавање.

На плоштадот беше истакнат и транспарент на кој пишуваше „Шест месеци без правда во Кочани“, а некои демонстранти носеа маички на кои пишуваше: „Не умираме од несреќи, умираме од корупција“.

Трагедијата во Кочани се случи на 16 март 2025 година кога во ноќен клуб во градот избувна голем пожар, при што загинаа 62 лица, а околу 200 беа повредени. Настанот предизвика силни реакции во јавноста, со барања за целосна истрага и изведување на виновниците пред лицето на правдата.