Mücahithan Avcıoğlu
02 Септември 2026•Ажурирано: 02 Септември 2026
Повеќе од 17 милиони барели нафта поминаа низ Ормускиот Теснец во понеделникот, изјави американскиот секретар за енергетика Крис Рајт за Си-ен-би-си, пренесува Анадолу.
„Кога ќе се земат предвид и количините нафта што протекуваат по нафтоводите низ Саудиска Арабија и Обединетите Арапски Емирати, кои го заобиколуваат Ормускиот Теснец, од регионот излегува повеќе нафта отколку во нормални услови пред војната“, изјави Рајт.
Овој обем е највисок дневен проток низ стратегискиот воден пат откако конфликтот со Иран почна да ги нарушува испораките на енергенти.
Пред почетокот на војната дневно речиси 20 милиони барели сурова нафта и нафтени деривати се движеа низ Ормускиот Теснец, што претставува околу една четвртина од глобалната трговија со нафта по морски пат, според Меѓународната агенција за енергетика.
Сообраќајот е нарушен поради нападите врз комерцијалните бродови, заканите од мини и зголемените трошоци за осигурување.
Тензиите повторно ескалираа оваа недела откако два танкера што превезуваа саудиска сурова нафта беа погодени при излегување од теснецот. Потоа САД започнаа напади врз ирански цели околу Ормускиот Теснец, вклучително и капацитети за поставување мини и поморски капацитети.
Иран возврати со напади врз американските бази во регионот, предизвикувајќи загриженост за натамошно нарушување на извозот на енергенти од Персискиот Залив.
Цените на нафтата вчера скокнаа за повеќе од 5%, при што меѓународниот референтен тип „Брент“ се тргуваше по цена од околу 94 долари за барел, а американскиот референтен тип „Вест Тексас Интермедиет“ (WTI) за околу 89 долари.
