Во Турција минибусите познати како долмуш, кои превезуваат посетители на „Фуар 38“, организиран со цел да се оживеат саемската култура и колективната меморија на Кајсери од минатото, ги враќаат патниците во едно друго време, пишува Анадолу.
Анадолскиот саем, кој ги отвори вратите во 1967 година и долго време беше едно од најважните места за собирање во градот, по неколкугодишна пауза повторно е отворен со ново име и концепт, со цел да се оживее оваа традиција.
Долмушите, со кои илјадници луѓе во минатото патувале кон саемот, овој пат се подготвени за „Фуар 38“, организиран од Општина Коџасинан.
Шест возила, кои за одредени настани ги превезуваат посетителите до саемскиот простор, привлекуваат внимание со каросериите од стар модел, деталите карактеристични за нивното време и уникатната атмосфера.
Возачот и дел од патниците го збогатуваат патувањето со облека, модни додатоци и фризури инспирирани од модата од 1960-тите и 1970-тите години, придружени со популарна музика од тој период.
Омер Бозкурт, возач на долмуш, за АА изјави дека оние што кон крајот на 1990-тите години доаѓале на саемот со семејствата, поминувале време уживајќи во многубројни содржини, од концерти до забавни паркови.
Посочувајќи дека голем дел од посетителите на саемот во тој период користеле долмуши, Бозкурт раскажа дека на „Фуар 38“ учествувал на покана на градоначалникот на Коџасинан, Ахмет Чолакбајракдар.
Бозкурт рече дека во рамките на настанот го изложува својот долмуш и во одредени денови ги превезува патниците до саемскиот простор.
„Ги превезуваме нашите граѓани до саемот, но истовремено ги водиме и на патување низ времето. Кога ќе го видат долмушот, им се враќаат старите денови, старите спомени и разговорите што се водеа во него. Се оживуваат спомените и доживувањата. Бидејќи овие возила им се познати на граѓаните од одредена возраст, кога ќе ги видат велат: ‘Ех, мојата младост! Што ли сè доживеавме во овие возила, колку спомени имавме!’“
Бетул Јилмаз, една од патничките што се качила во долмушот облечена во облека инспирирана од модата од 1960-тите и 1970-тите години, рече дека повторно ги доживеала спомените од детството и младоста.
„Ме трогна тоа што се вратив во минатото. Беше прекрасно. Се потсетив на старите денови и им оддадов почит на тие спомени“, рече патничката Хајрије Озсој.
Патникот Вахди Морбоа изјави дека не ги заборавил разговорите за пари меѓу возачот и патниците во долмушот.
Нијази Дериџиоглу, кој се фотографирал покрај возилото, истакна дека се трогнал кога го видел.
