Општинскиот работник Сулејман Јилдиз, кој ги загубил татко му и сестра му во земјотресите на 6 февруари 2023 година во округот Арсуз во турскиот град Хатај, им дели играчки на децата во населбите што ги посетува со својот украсен камион за смет.
Сулејман Јилдиз (40), кој ги загубил татко му Мустафа (69) и сестра му Озге (24) откако петкатна зграда во населбата Чај во округот Искендерун се урнала во земјотресите со епицентар во Кахраманмараш, неповреден ја преживеал катастрофата во својот дом во округот Арсуз.
Откако поминал низ тешки денови, Јилдиз во декември 2025 година бил вработен од Општина Арсуз како возач на камион за смет.
Сакајќи да го зачува споменот на својот татко, кој многу ги сакал децата, Јилдиз почнал да ги чисти кадифените играчки и играчките што ги наоѓал додека се движел со своето возило.
Некои добротвори, кои биле трогнати од тоа што Јилдиз им ги подарувал на децата дезинфицираните играчки, го поддржале неговиот ангажман.
Носејќи ги со себе и играчките што ги донирале добротворите, Јилдиз со својот украсен камион за смет ги радува со подароци децата во населбите што ги посетува.
Сулејман Јилдиз за Анадолу изјави дека децата кои ќе го видат како влегува на улицата го пречекуваат со возбуда.
Тој рече дека додека ја извршува својата работа, истовремено ги прави децата среќни. „Секој ден ги чистиме играчките и им ги подаруваме на децата. Сега нè препознаваат во населбите во кои влегуваме. Кога ќе соберат доволно, ги земаме кесите и одиме кај нив. Сите се среќни. Добиваме и благослови од повеќето семејства“, рече тој.
Јилдиз раскажа дека откако на својот профил на социјалните мрежи ги објавил снимките од делењето подароци, добротвори почнале да му испраќаат играчки.
Наведувајќи дека неговиот покоен татко многу ги сакал децата, Јилдиз рече: „И ние се угледавме на него и продолжуваме по овој пат. Фала му на Бога, секој ден ќе усреќуваме деца. Така сме среќни. Јас немам сон. Само сите деца да бидат среќни, а ние да продолжиме да си го заработуваме лебот и да си ја работиме работата, тоа е доволно.“
Раскажува дека и неговата сопруга и блиските му ги даваат собраните играчки за да ги подели.
„Ова е еден од окрузите погодени од земјотресот. И децата беа негативно погодени од земјотресот. Се обидовме да им помогнеме да заборават некои работи и да ги усреќиме децата со подароци. Насекаде добиваме убави вести и слушаме убави зборови“, додаде Јилдиз.
