Грција: Економските мигранти вратени во Атина, бегалците од воените региони започнаа да преминуваат во Македонија

АТИНА (АА) - Во придружба на грчката полиција 2.300 мигранти кои не доаѓаат од со војна зафатените Сирија, Авганистан и Ирак, со автобуси се вратени од грчко-македонската граница и сместени се во спортска сала која за таа цел ја обезбеди општината Палео Фалиро во Атина, јавува Anadolu Agency (AA).

Станува збор за мигрантите кои се третираат како економски, и кои поради одлуката на Македонија да се примаат само бегалци од воените подрачја, изминативе три недели поминаа чекајќи во пограничниот Идомени.

Акцијата за враќање на економските мигранти од границата во Атина траеше 10 часа, а дел од мигрантите одбија сместување во спортската сала и се упатија кон центарот на Атина.

По завршувањето на таа акција, грчката полиција почна да ги превезува бегалците од Сирија, Авганистан и Ирак кон македонската граница. Овие бегалци изминативе неколку дена чекаа на оддалеченост од околу 15 километри од границата, а сега преминуваат во Македонија, од каде ќе го продолжат патот кон западна Европа.

Македонија неодамна донесе одлука дека со цел намалување на бранот бегалци кон Европа, да дозволи влез од Грција само на бегалците од со војна зафатените земји. Тоа предизвика бурни протесни на т.н економски мигранти кои на грчко-македонската граница дошле претежно од Пакистан и Иран. Се обидоа присилно да ја поминат границата во што ги спречи македонската полиција.