Стареењето на населението може да доведе до пораст на инфекции отпорни на антибиотици во Европа

ИСТАНБУЛ (АА) – Новото истражување предупредува дека до 2050 година Европа може да се соочи со зголемување на инфекциите во крвта отпорни на антибиотици што, главно, ќе биде резултат на стареењето на населението и повисоките стапки на инфекции кај мажите, јавува Анадолу.

„Стареењето на нашите популации може да придонесе за зголемување на смртноста и морбидитетот предизвикани од антимикробна резистенција (АМР), поради зголемениот ризик од сериозни бактериски инфекции со возраста“, се наведува во студијата објавена во вторникот во списанието „ПЛОС Медисин“ од истражувачи во Лондонската школа за хигиена и тропска медицина.

Во студијата се предвидува дека стапките на инфекции во крвта отпорни на лекови може повеќе да растат кај мажите отколку кај жените во шест од осум бактерии опфатени со европската мрежа за надзор на антимикробна резистенција (EARS-Net) во периодот од 2015 до 2019 година, а најизразен пораст се очекува кај постарите лица над 74 години.

Истражувачите анализирале повеќе од 12 милиони лабораториски резултати од 29 европски земји собрани во период меѓу 2010 и 2019 година. Врз основа на овие податоци, тие направиле прогнози како отпорните бактериски инфекции во крвта би можеле да се развиваат до 2050 година, земајќи ги предвид возраста и полот.

Научниците предупредуваат дека бактериските инфекции отпорни на антибиотици претставуваат „сериозна и сè поголема закана за јавното здравје.“

Според студијата, проекциите што не ги земаат предвид разликите меѓу половите и возрасните групи може значително да го потценат идниот товар од отпорни инфекции, особено кај мажите и повозрасното население.

Во истражувањето, исто така, е утврдено дека дури и со силни јавно-здравствени мерки, речиси една третина - околу 32% од испитаните комбинации на бактерии и антибиотици сè уште нема да ја достигнат целта за намалување од 10% на стапките на инфекции до 2030 година.