Турски астронаут дел од меѓународниот тим кој ќе тргне во суборбитален лет

ЊУ МЕКСИКО (АА) - Тим астронаути, меѓу кои е и вториот турски патник во вселената, Тува Џихангир Атасевер, ќе полета од американската сојузна држава Њу Мексико во суборбитален истражувачки лет на ВСС Јунити на Вирџин Галактик, јавува Анадолу.

Атасевер патува во улога на истражувачки астронаут на последниот лет на вселенското летало Галактик 07. Полетувањето на шестчлениот екипаж е закажано за 8.30 часот по локално време. Тимот се состои од тројца астронаути, двајца американски и еден италијански, и двајца пилоти.

Летот се очекува да трае околу 70 минути, ВСС Јунити ќе достигне височина од над 13.700 метри на ракетата-носач. Потоа ќе се активира хибридниот погонски систем за да достигне височина од приближно 90 километри.

Атасевер ќе спроведе седум научни експерименти во услови на микрогравитација за време на приближно триминутната фаза на слободен пад.

Американската компанија за вселенски туризам „Вирџин Галактик“ во мај соопшти дека отворила нов објект во Јужна Калифорнија за производство на вселенското летало од следната генерација „Делта“, кое ќе може да реализира по осум мисии месечно.

- Научни експерименти -

Атасевер ќе носи модифицирано астронаутско одело подготвено за спроведување на три експерименти, меѓу кои и експериментот за снимање на мозокот „Бикон“.

Овој експеримент користи блиска инфрацрвена спектроскопија на неговата глава за испитување на протокот на крв во префронталниот кортекс на мозокот и динамиката на цереброспиналната течност. Ќе бидат собрани примероци од Атасевер за да се проучат психолошките промени од гледањето на Земјата од вселената.

Експериментот со радијацискиот дозиметар ИвмеРад ќе ја мери изложеноста на радијација, што ќе помогне да се предвиди идната изложеност на вселенските патници во реално време.

При тестирањето на вселенското инсулинско пенкало, што е проект во соработка помеѓу Турската вселенска агенција (TUA) и Аксиом спејс, за прв пат ќе се користат две различни инсулински пенкала за да се процени ефикасноста на испораката на дозата инсулин.

Ова ќе биде првиот тест за методи на лекување за идните дијабетичари кои ќе патуваат во вселената.

Друг експеримент наречен Анализа на везикула во суборбитален лет, ќе користи специјално дизајниран микрочип за анализа на биолошки примероци земени од Атасевер пред и по летот. Ова истражување има за цел да развие терапии за да им се помогне на астронаутите подобро да се адаптираат на патувањето во вселената пред полетувањето.

Три други експерименти - Порака, Метаболом и Миелоид, ќе бидат повторени за време на летот на Атасевер, откако беа спроведени за време на претходното патување до Меѓународната вселенска станица од страна на првиот турски астронаут Алпер Гезеравџи.

Со експериментот Порака ќе се мерат ефектите на микрогравитацијата врз човечката физиологија, додека Метаболом ќе ги открива биомолекуларните промени предизвикани од летот во вселената.

Миелоид ги испитува промените во клеточните групи кои го потиснуваат одговорот на имунолошкиот систем за време на воспалителни болести.

Вселенското патување на Атасевер следи по историската мисија на првиот турски астронаут Гезеравџи во јануари на Меѓународната вселенска станица како дел од Мисијата Аксиом 3.