Elena Teslova
01 Декември 2023•Ажурирај: 01 Декември 2023
МОСКВА (АА) - Рускиот министер за надворешни работи Сергеј Лавров денес ги критикуваше највисоките дипломати на Европската Унија (ЕУ) и Соединетите Американски Држави (САД) за пропуштање на состанокот на Министерскиот совет на Организацијата за безбедност и соработка во Европа, нарекувајќи ги „кукавици“, јавува Анадолу.
Лавров на прес-конференцијата во Скопје рече дека високиот претставник на ЕУ за надворешни работи Жозеп Борел и американскиот државен секретар Ентони Блинкен го напуштиле настанот затоа што „се плашеле од искрен разговор“ на форумот на 57 држави.
„На овој настан не присуствуваа ниту украинскиот министер, ниту министрите од Полска и од балтичките земји. Блинкен и Борел исто така си заминаа, како што разбрав јас. Зошто се случува ова? Тие веројатно мислат дека со тоа ја нагласуваат својата намера да ја изолираат Русија“, рече тој и додаде: „Сметам дека тие се само кукавици, кои се плашат од каков било искрен разговор со факти.“
Според проценките на министерот, поради овој страв, западните земји им ги одбиваат визите на руските дипломати кои присуствуваат на меѓународни настани на нивна територија.
„Ова е елементарен кукавичлук. Во две години од хистеричната хибридна војна на Западот против Русија, видовме дека западните земји немаат јасни и разумни аргументи“, рече тој.
На прашањето за можноста од мировни преговори со Украина, Лавров рече дека Москва не гледа индикации за подготвеност за политичко решение од страна на Киев или од западните земји.
Во одговор на прашањето „Какви воени закани гледа Русија на украинска територија“, рускиот министер рече дека плановите за изградба на база на британската морнарица во Азовското Море и американска база во Црното Море се „неприфатливи под никакви околности“.
Лавров ги критикуваше западните земји за нивниот неконструктивен пристап кон работата на ОБСЕ, велејќи дека наместо да се обидуваат да ја решат актуелната криза, тие повеќе се занимаваат со продолжување на мандатите на некои административни службеници кои директно ги прекршиле принципите на организацијата.
На прашањето „Дали се подобриле шансите за спас на ОБСЕ по состанокот во Скопје,“ Лавров одговори: „Шансите се зголемени, но не и за зачувување на ОБСЕ.“
Северна Македонија беше домаќин на дводневниот состанок на Министерскиот совет на ОБСЕ, што заврши денес. На него присуствуваа претставници од над 50 земји.
