Муцунски во Охрид со чешкиот колега Мацинка: Потврдено продлабочувањето на билатералната соработка

Министерот за надворешни работи и надворешна трговија на Северна Македонија, Тимчо Муцунски, денеска во Охрид го пречека својот чешки колега, вицепремиерот и министер за надворешни работи, Петар Мацинка, кој престојува во официјална посета на земјата, пренесува Анадолу.

Муцунски во објава на американската платформа на социјални мрежи Х истакна дека со Мацинка е разговарано за натамошното зајакнување на билатералното партнерство и политичкиот дијалог, како и за актуелните регионални и меѓународни случувања.

„Ја потврдивме важноста на тесната соработка како сојузници во НАТО и изразивме благодарност за принципиелната и доследна поддршка од Чешка за нашиот европски пат“, истакна Муцунски.

Тој посочи дека во разговорот е нагласен потенцијалот за зголемување на трговската размена, нови инвестиции и конкретна соработка во областа на транспортот, инфраструктурата, енергетиката, туризмот, земјоделството и технологијата.