Полскиот премиер бара ново гласање за ветото на криптозаконот, се проширува истрагата за берзата „Зондакрипто“

Полскиот премиер Доналд Туск денес изјави дека ќе побара парламентарно гласање за последното вето на претседателот Карол Навроцки на законските измени со кои се регулира пазарот на криптоактиви, додека истрагата за пропаднатата берза за криптовалути „Зондакрипто“ се проширува и ги опфаќа лицата поврзани со конзервативната опозиција, пренесува Анадолу.

Туск ја обвини партијата Право и правда (ПиС) дека има широки врски со компанијата и рече дека пратениците сега имаат можност да поддржат построга регулација на секторот.

„Нема сомнеж дека овој валкан и матен бизнис беше многу силно поврзан со целото опкружување на ПиС“, рече Туск, додавајќи дека доказите за финансиски врски меѓу медиумските организации и политичарите стануваат сè појасни. Тој го опиша случајот како потенцијално најголемиот скандал во современата полска политичка историја.

Навроцки, кого ПиС го поддржа на претседателските избори во 2025 година, трипати стави вето на владините законски измени за регулирање на криптоактивите – во декември 2025, февруари и јуни 2026 година – тврдејќи дека мерките претставуваат прекумерна регулација.

Владејачката коалиција не успеа да обезбеди трипетинско мнозинство во Парламентот, потребно за поништување на првите две вета. Парламентот сè уште нема гласано за последното вето на Навроцки, донесено на 11 јуни.

Предложениот закон би го определил Полскиот орган за финансиски надзор (КНФ) како главен регулатор на пазарот на криптоактиви и би му дал овластување да санкционира компании што работат во секторот. Полска исто така е под притисок да го усогласи своето домашно законодавство со правилата на Европската Унија за пазарите на криптоактиви, познати како MiCA.

Потегот на Туск уследи по серијата откривања поврзани со „Зондакрипто“, која пропадна претходно годинава. Обвинителството истражува наводни финансиски врски меѓу компанијата и конзервативни политичари, фондации и медиумски организации. Поранешниот директор на „Зондакрипто“, Пшемислав Крал, е обвинет во рамките на истрагата и соработува со обвинителството, според неговиот адвокат.

Туск исто така тврдеше дека средства поврзани со „Зондакрипто“ биле пренасочувани кон десничарски медиуми, политички настани и фондации.

ПиС ги отфрли наводите дека партијата била одговорна за заштитата на компанијата за криптовалути.