Бројот на жртви во инцидентот на обуката во Каспиското Море се искачи на 14

Бројот на загинати во инцидентот што се случи вчера во Каспиското Море, кога 17 казахстански војници беа однесени од струите за време на воената вежба, се искачи на 14, соопшти денес Министерството за одбрана, пренесува Анадолу.

Министерството преку Телеграм објави дека ги завршило операциите за пребарување и спасување по инцидентот и дека утрово ги извлекло телата на уште двајца војници.

„Раководството и персоналот на Министерството за одбрана и на Вооружените сили на Република Казахстан упатуваат длабоко и искрено сочувство до семејствата и блиските на загинатите војници. Семејствата на загинатите ќе ја добијат сета неопходна сеопфатна, финансиска и психолошка поддршка“, се додава во соопштението.

Вчера Министерството соопшти дека 17 војници биле однесени од струите во југозападниот регион Мангистау додека извршувале борбена обука, при што првично беше потврдена смртта на деветмина од нив.

Беше наведено дека инцидентот се случил „поради нагло влошување на временските услови и засилување на ветерот“, како и дека на местото на настанот итно била испратена комисија предводена од министерот за одбрана Даурен Косанов за да се утврдат околностите под кои се случил инцидентот.

Подоцна дента претседателот на Казахстан, Касим-Жомарт Токаев, потпиша указ со кој денес е прогласен за ден на национална жалост.