Египет ја поздрави одлуката за привремен прекин на огнот меѓу САД и Иран

Египет вчера ја поздрави одлуката за двонеделен прекин на огнот меѓу Соединетите Американски Држави (САД) и Иран, опишувајќи го овој чекор како „клучна можност“ за напредок во преговорите, јавува Анадолу.

Министерството за надворешни работи на Египет објави официјално соопштение во кое се истакнува дека прекинот на воените операции од страна на САД, заедно со одговорот на Иран, претставува значајна шанса што треба да се искористи за да се отвори патот кон дипломатија, конструктивен дијалог и преговори.

Министерството нагласи дека е од суштинско значење да се продолжи во насока на овој чекор преку целосна посветеност на прекинот на воените дејства, почитување на слободата на пловидба и поддршка на сите иницијативи насочени кон постигнување мир.

Притоа беше потврдено дека Египет ќе продолжи со напорите со регионалните и меѓународните партнери за зајакнување на стабилноста во регионот.

Во соопштението, исто така, беше нагласена важноста од „почитување на суверенитетот, единството и територијалниот интегритет“ на земјите од Советот за соработка во Персискиот Залив (ГЦЦ) и Јордан, притоа отфрлајќи какви било прекршувања и нагласувајќи дека нивната безбедност е тесно поврзана со безбедноста на Египет.

Египетскиот министер за надворешни работи Бадр Абделати утринава телефонски разговараше со специјалниот пратеник на САД за Блискиот Исток, Стив Виткоф, за да зборуваат за најновите случувања.

Абделати изрази благодарност за привремениот прекин на огнот, нагласувајќи ја „потребата да ѝ се даде шанса на дипломатијата“ и да започнат сериозни преговори меѓу американската и иранската страна за решавање на сите отворени прашања на начин што ќе ја осигури меѓународната безбедност и ќе ја гарантира слободата на пловидбата, соопшти Министерството.

Тој ги пофали напорите на Пакистан и регионалните партнери, потврдувајќи ја поддршката на Египет за сите иницијативи насочени кон воспоставување траен мир, се додава во соопштението на Министерството.

Американскиот претседател Доналд Трамп синоќа објави дека се согласил „да ги прекине бомбардирањата и нападите врз Иран во период од две недели“.

Регионалните тензии ескалираа откако САД и Израел започнаа заедничка офанзива врз Иран на 28 февруари, во која досега загинаа над 1.400 луѓе, меѓу кои и тогашниот врховен лидер ајатолахот Али Хамнеи.

Иран возврати со напади со беспилотни летала и ракети насочени кон Израел, Јордан, Ирак и земјите од Персискиот Залив каде што има американски воени бази, предизвикувајќи жртви и штета на инфраструктурата и нарушувајќи ги глобалните пазари и авиосообраќајот.