ЕУ ги продолжи мандатите на цивилните мисии на палестинските територии

Европската Унија (ЕУ) денес ги продолжи мандатите на своите мисии за гранична помош и полициска поддршка на палестинските територии за девет месеци, до 30 јуни 2027 година, јавува Анадолу.

Европскиот совет соопшти дека ги обновил мандатите на Мисијата на ЕУ за гранична помош на преминот Рафа (ЕУБАМ Рафа) и Полициската мисија на ЕУ за палестинските територии (ЕУПОЛ КОППС).

Одлуката е донесена по заклучоците што лидерите на ЕУ ги усвоија во јуни, со кои повторно ја потврдија посветеноста на блокот на меѓународното право и на „сеопфатен, праведен и траен мир“ заснован врз решението со две држави, соопшти Советот.

ЕУ, исто така, ја потврди подготвеноста да помогне во спроведувањето на сеопфатен мировен план за Газа, вклучително и преку двете мисии.

Продолжувањето на мандатите следува по стратегискиот преглед спроведен од Европската служба за надворешно дејствување, кој го одобри Политичкиот и безбедносен комитет на ЕУ. Одлуката е донесена врз основа на писма од Палестинската управа и Израел, се наведува во соопштението.

ЕУБАМ Рафа ја поддржува изградбата на ефикасно и одржливо управување со границите на преминот Рафа и воспоставена е во 2005 година.

ЕУПОЛ КОППС, воспоставена во 2006 година, ги поддржува палестинските напори за зајакнување на полициските сили и институциите за кривична правда.