Мерц: Членството на Црна Гора во ЕУ е реално остварлива цел

Германскиот канцелар Фридрих Мерц порача дека Црна Гора остварила значителен напредок на европскиот пат и дека членството во Европската Унија (ЕУ) е реално остварлива цел во воведното обраќање на Самитот на лидерите на Берлинскиот процес, кој се одржува во Милочер, Црна Гора, пренесува Анадолу.

Тој нагласи дека земјата речиси ги завршила преговорите за пристап, истакнувајќи дека реформите, политичката волја и регионалната соработка се клучни за натамошниот напредок на Западен Балкан.

„Покажувате напредок и дека пристапувањето кон Европската Унија е навистина можно. Бевте одлучни и вашиот труд се исплатеше. Ова е регион во движење, регион на промени, но тие промени мора да дојдат однатре. Тоа е една од основните идеи на Берлинскиот процес – да се соберат земјите од Западен Балкан на иста маса, да се поттикне и зајакне регионалната соработка“, изјави Мерц, пренесува порталот РТЦГ.

Тој истакна дека од средбата во Тиват во јуни оваа година е постигнат напредок во зајакнувањето на Берлинскиот процес.

„Откако се сретнавме во Тиват во јуни, го вративме Берлинскиот процес на вистинскиот пат. Црна Гора речиси ги заврши преговорите за пристап и заеднички работиме за да овозможиме проширување засновано врз заслугите. Францускиот претседател Емануел Макрон и јас заеднички изнесовме предлози за проширувањето, од кои Европската комисија прифати многу. Ѝ благодариме на комесарката Марта Кос за тоа“, порача тој.

Тој нагласи дека за продолжување на европската интеграција е неопходно земјите од регионот да покажат подготвеност за спроведување реформи и политичка одлучност. Зборувајќи за протестите и политичките тензии, Мерц укажа на важноста од зачувување на мирот, спротивставување на насилството и надминување на поделбите.

„Протестите во регионот нè потсетуваат дека мора да продолжиме со проширувањето и зајакнувањето на мирот. Кога сме соочени со протести, било во Европската Унија или на друго место, насилството не смее да биде опција за ниедна страна.“

Тој предупреди дека нерешените прашања од минатото и политичката поларизација претставуваат пречка за изградба на постабилна и поуспешна Европа.

„Многу е тешко да се напредува ако минатото постојано нè задржува. Поларизацијата никогаш нема да доведе до поуспешна Европа. Ја отфрливме глорификацијата на воените злосторници и, ако сакаме подобра иднина за нашите деца, не смееме да долеваме масло на огнот. Мора да го нормализираме дијалогот меѓу Приштина и Белград“, порача Мерц.

Тој повика на одговорност и конкретен напредок во решавањето на отворените прашања во регионот, нагласувајќи дека Германија останува посветена на Берлинскиот процес и на европската перспектива на Западен Балкан.

Целта на Берлинскиот процес е зајакнување на регионалната соработка, економско поврзување и добрососедски односи, како и забрзување на европската интеграција на земјите од Западен Балкан.

Со денешниот самит Црна Гора го завршува претседавањето со Берлинскиот процес, во чии рамки беа организирани 26 настани, од кои 14 на министерско ниво. Според податоците на Владата, ова е најголем број активности организирани за време на едно претседавање со оваа иницијатива.

Во фокусот на разговорите ќе бидат заедничките иницијативи што придонесуваат за развојот на регионот и неговото приближување кон Европската Унија.