ОАЕ: Воздухопловните сили одговорија на беспилотно летало што се приближувало од Иран

Обединетите Арапски Емирати (ОАЕ) денес соопштија дека нивните воздухопловни сили одговориле на беспилотно летало забележано над територијалните води на земјата, кое се приближувало од Иран, соопшти Министерството за одбрана, пренесува Анадолу.

Во соопштението Министерството наведе дека воздухопловните сили на ОАЕ реагирале откако беспилотното летало било забележано над територијалните води на Емиратите.

Се додава дека вооружените сили на ОАЕ остануваат во состојба на висока готовност за справување со сите потенцијални закани.

Соопштението беше објавено само неколку часа откако иранската армија рано утринава соопшти дека лансирала десетици беспилотни летала со експлозив кон американските војници и хеликоптери стационирани во воздухопловната база Ал-Минхад во Обединетите Арапски Емирати, како одмазда за американскиот напад врз иранскиот остров Ларак.

Американските сили вчера нападнаа два ирански лансера на островот Ларак, што претставуваше прв американски напад врз иранска територија од крајот на јули.

Во операцијата биле нападнати системи за кои се тврди дека биле подготвувани за лансирање ракети со поморски мини кон Ормускиот Теснец.

Иранската исламска револуционерна гарда соопшти дека во нападот биле убиени или повредени неколку борци и цивили и вети дека ќе возврати.