Mohammad Sıo
05 Март 2026•Ажурирај: 05 Март 2026
ИСТАНБУЛ (AA) - Обединетите Арапски Емирати (ОАЕ) соопштија дека нивните системи за воздушна одбрана уништиле шест балистички ракети и пресретнале 125 беспилотни летала од Иран, пренесува Анадолу.
Во соопштението на социјалната мрежа на американската компанија X Министерството за одбрана на ОАЕ наведе дека воздушната одбрана детектирала седум балистички ракети, при што уништила шест, а една ракета паднала на територијата на земјата.
Министерството додаде дека се детектирани и 131 беспилотно летало, при што 125 успешно се пресретнати, а шест паднале на територијата на земјата.
Откако во саботата започнаа иранските напади, Министерството соопшти дека воздушната одбрана детектирала 196 балистички ракети, при што уништила 181, 13 ракети паднале во море, а две на територијата на земјата.
Исто така, биле детектирани 1.072 ирански дронови, од нив пресретнале 1.001, а 71 паднал на територијата на ОАЕ.
Министерството додаде дека осум крстосувачки ракети, исто така, биле детектирани и уништени од системите за воздушна одбрана.
Според Министерството, во нападните загинале три лица - државјани од Пакистан, Непал и Бангладеш - а 94 се здобиле со лесни повреди.
Министерството истакна дека вооружените сили „остануваат целосно подготвени да се спротивстават на какви било закани и цврсто да одговорат на сè што се обидува да ја загрози безбедноста на земјата, осигурувајќи ги заштитата на суверенитетот, стабилноста и националните интереси“.
Од 28 февруари Иран лансира ракети и беспилотни летала кон Израел и земјите од Заливот, каде што се сместени американски воени сили. Во некои од нападите има жртви и предизвикани се штети на цивилни објекти, вклучително и пристаништа и станбени згради.
Техеран соопшти дека нападите се во одговор на воената кампања на САД и Израел против Иран, во која има стотици загинати, меѓу кои и врховниот лидер Али Хаменеи и високи воени лица.
