Отворените антикварници за книги во срцето на Дамаск ги зближуваат љубителите на книгата

Отворените штандови со книги поставени под Претседателскиот мост во центарот на главниот град на Сирија, Дамаск, и во околината на гаражите Бармеке, им нудат на читателите поинакво место за средба со книгите во градскиот метеж, пишува Анадолу.

Културата на антикварниците за книги на отворено во Дамаск покажува дека пристапот до книгите и знаењето не е привилегија на одредена група и дека оваа култура е важен дел од длабоко вкоренетиот идентитет на градот.

Пешаците, жителите на градот и студентите на универзитетите што во текот на денот минуваат низ областа со часови остануваат меѓу штандовите покрај патот, разгледувајќи ги делата што им го привлекуваат вниманието. Некои читатели претпочитаат долго да ги разгледуваат книгите што им се допаѓаат пред да ги купат.

Просторите со густ сообраќај и звуци на сирени и свирежи на автомобили, благодарение на штандовите со книги поставени покрај тротоарите, во секој дел од денот се претвораат во живописна средина на култура и знаење.

- „(Отворените антикварници за книги) Би сакал да се прошират насекаде каде што има голема фреквенција“ -

Мухамед Јусуф, кој е сопственик и на книжарницата „Дар Убаде“, за Анадолу раскажа дека на својот штанд не само што продава книги, туку и ги обиколува другите штандови и купува нови книги.

Јусуф вели дека позитивно гледа на ширењето на продажбата на книги на јавни и фреквентни места.

Нагласувајќи дека ширењето на штандовите со книги низ градот е „многу добро“, Јусуф посочи: „Би сакал да се прошират насекаде каде што има голема фреквенција. Сепак, подобро би било тие да бидат уредни и систематизирани, односно да не бидат расфрлани и неуредни, за луѓето, просторот и пешаците.“

Јусуф наведе дека значителен дел од книгите што се продаваат на штандовите се набавуваат од лични библиотеки во домовите, така што е можно да се дојде до стари дела што не може да се најдат во стандардните книжарници.

- „Понекогаш тука наоѓам дела што ги нема во книжарницата“ -

Раскажувајќи дека редовно ги посетува штандовите со книги, Јусуф вели: „Доаѓам речиси секој ден, а ако не можам, тогаш секоја недела. Ако видам книга што ја немам или сакам да ја прочитам, ја купувам. Понекогаш тука наоѓам дела што ги нема во книжарницата.“

Јусуф истакна дека овде некои книги се продаваат по поповолни цени во споредба со книжарниците, но додаде дека за некои дела што се сметаат за ретки или вредни може да се бара и повисока цена.