Поранешниот француски претседател Саркози осуден на пет години затвор

ЖЕНЕВА (АА) - Поранешниот француски претседател Никола Саркози денес е осуден на пет години затвор за заговор во случајот поврзан со либиското финансирање на неговата изборна кампања во 2007 година, според извештаите на медиумите, пренесува Анадолу.

Се очекува обвинителите да го повикаат во рок од еден месец за да го информираат кога ќе започне да ја издржува казната.

Судот го прогласи Саркози, кој негираше какво било кривично дело, за виновен за заговор, но го ослободи од обвинението за пасивна корупција и други обвиненија за нелегално финансирање, се вели во извештаите.

Саркози се соочи со обвиненија за нелегално финансирана кампања, пасивна корупција, прикривање проневера на јавни фондови и заговор.

Обвинителството го карактеризира наводниот договор од 2005 година помеѓу тогаш министер за внатрешни работи Саркози и тогашниот либиски лидер Моамер Гадафи како „пакт за корупција незамислив, невиден, непристоен“.

Саркози беше избран за претседател на Франција во 2007 година и ја извршуваше функцијата до 2012 година.