САД, Иран и посредниците преговараат за можен 45-дневен прекин на огнот

Соединетите Американски Држави (САД), Иран и регионалните посредници водат итни разговори за можен 45-дневен прекин на огнот што би можел да доведе до траен прекин на војната, објави порталот „Аксиос“ вчера, повикувајќи се на американски официјални претставници, пренесува Анадолу.

Иако изворите наведуваат дека шансите за постигнување дури и делумен договор во следните 48 часа се мали, официјалните лица на овие разговори гледаат како на последна можност да се спречи голема ескалација.

Таа би можела да вклучи напади врз иранската цивилна инфраструктура и одмазднички напади врз капацитетите за нафта и вода во земјите од Персискиот Залив.

Првичниот 10-дневен рок што американскиот претседател Доналд Трамп му го постави на Иран треба да истече вечерва.

Сепак, Трамп вчера го продолжи рокот за 20 часа, поставувајќи нов краен рок до вторник во 20 часот по источноамериканско време, изјавувајќи за „Аксиос“ дека е можен договор пред тој термин.

„Постојат добри шанси, но ако не се согласат, ќе разнесам сè таму“, предупреди Трамп, најавувајќи напади врз иранската инфраструктура доколку не се постигне договор. Од друга страна, Иран вети одмазда против Израел и земјите од Персискиот Залив.

Два извора изјавија дека американско-израелскиот план за напади врз енергетските постројки на Иран е подготвен, иако продолжувањето на рокот има цел да ѝ даде последна шанса на дипломатијата.

Посредници од Пакистан, Египет и Турција, заедно со директни пораки меѓу Трамп, неговиот пратеник Стив Виткоф и иранскиот министер за надворешни работи Абас Арагчи, ги олеснуваат разговорите.

Иако САД предложија неколку планови, Иран не се согласи со нив.

Предложениот договор се состои од две фази: прва фаза 45-дневен прекин на огнот за да се остави простор за поголеми преговори и, втора фаза, трајно решение што ќе ги опфати иранските резерви на ураниум и повторното отворање на Ормускиот Теснец.

Посредниците, исто така, истражуваат делумни чекори што Иран би можел да ги преземе во врска со овие прашања, како и гаранции од САД дека прекинот на огнот ќе се почитува.

Иранските власти предупредија дека не сакаат привремен прекин на огнот, сличен на оние во Газа или Либан, каде што непријателствата може да продолжат во секој момент.

Изворите предупредија дека иранските одмазднички напади против потенцијалните американско-израелски напади би можеле сериозно да ја оштетат нафтената и водната инфраструктура во Персискиот Залив.

Посредниците нагласуваат дека следните 48 часа се клучни за да се избегне уништување од големи размери.

Во меѓувреме, морнарицата на иранската Исламска револуционерна гарда во неделата соопшти дека ситуацијата во Ормускиот Теснец за САД и Израел „никогаш нема да се врати“ во состојбата пред војната.