Serdar Dincel
06 Август 2026•Ажурирано: 06 Август 2026
Саудискиот контраадмирал Абдула бин Салем ал-Шехри е назначен за командант на мултинационалната поморска коалиција задолжена за безбедноста на клучните регионални поморски траси, соопшти денес Министерството за одбрана на Саудиска Арабија, јавува Анадолу.
Во соопштението, објавено на американската платформа за социјални медиуми X, се наведува дека командантот ќе раководи со заедничката поморска одбрана, ќе ја координира соработката со земјите членки и другите поморски коалиции и ќе ги извршува задачите во согласност со повелбата на коалицијата.
Министерството соопшти дека сѐ повеќе земји ги завршуваат процедурите за вклучување во коалицијата, при што некои веќе ја потпишале заедничката декларација, а други се во завршна фаза на потпишување на декларацијата и повелбата пред нивното формално пристапување како основачки членки.
Се додава дека коалицијата е „отворена меѓународна иницијатива“ што ги поздравува сите држави што ги споделуваат нејзините цели и принципи и дека продолжува да прима барања за членство.
Министерството најави дека дополнително ќе биде објавено соопштение со имињата на земјите што ги завршиле процедурите за потпишување.
Исто така, беше наведено дека на 12 и 13 август ќе се одржи состанок на планерите на коалицијата, на кој ќе се финализира нејзината институционална рамка и ќе се создадат услови за вклучување на уште повеќе држави.
На 30 јули Саудиска Арабија и уште 13 земји го објавија формирањето на Мултинационалната поморска одбранбена коалиција, чија цел е заштита на непреченото пловење, меѓународната трговија и маршрутите за снабдување со енергенти во теснецот Баб ел-Мандеб, Црвеното Море и Аденскиот Залив.
