Шефот на руската дипломатија се сретна со иранскиот колега и со генералниот секретар на ОН

Рускиот министер за надворешни работи Сергеј Лавров разговараше со иранскиот колега Абас Арагчи и со генералниот секретар на ОН, Антонио Гутереш на маргините на 81. заседание на Генералното собрание на ОН во Њујорк, според официјалните соопштенија, јавува Анадолу.
За време на средбата меѓу Лавров и Арагчи доцна синоќа двете страни разговараа за итни регионални и меѓународни прашања, со фокус на развојот на ситуацијата околу Иран, соопшти руското Министерство за надворешни работи.

„Тие нагласија дека нема алтернатива на дипломатското решение на кризата предизвикана од незаконските дејства на Соединетите Американски Држави и Израел“, се наведува во соопштението.

Во него се додава дека двете страни му посветиле внимание и на спроведувањето на билатералните договори постигнати по средбата на рускиот и иранскиот претседател во киргистанскиот главен град Бишкек на 1 септември, одржана на маргините на самитот на Шангајската организација за соработка.

„Министрите го разгледаа распоредот на претстојните руско-ирански контакти на различни нивоа“, се додава.

Во одделно соопштение за средбата на Лавров со генералниот секретар на ОН, одржана подоцна вечерта, се наведува дека разговорите биле фокусирани на актуелни прашања поврзани со работата на ОН, особено на резултатите од мандатот на Гутереш како шеф на организацијата.

Лавров ја истакна важноста на „внимателно осмислена реформа на ОН“, со цел организацијата да се приспособи на „реалностите на мултиполарниот светски поредок“, се наведува во соопштението, при што нагласил дека е потребно да се зголеми застапеноста на претставници од „глобалното мнозинство“ во Секретаријатот на ОН и персоналот на ОН да ги извршува своите должности на „непристрасен и балансиран“ начин.

„Тој, исто така, нагласи дека е недозволиво да се поткопува меѓувладиниот карактер на организацијата или да се нарушува воспоставената поделба на надлежностите меѓу нејзините главни органи“, се наведува во соопштението.

Рускиот министер за надворешни работи пристигна во Њујорк доцна во вторникот, каде што во сабота треба да се обрати пред Генералното собрание на ОН.