Автобуска несреќа во египетски Јужен Синај, 16 загинати, 28 повредени

Најмалку 16 лица загинаа, а 28 се повредени денес откако патнички автобус се превртел во египетската провинција Јужен Синај, соопшти Министерството за здравство, пренесува Анадолу.

Несреќата се случила на патот Дахаб - Нувејба, пред областа Ал Саада, во правец кон Нувејба, соопшти Министерството.

Портпаролот на Министерството, Хосам Абдел Гафар, изјави дека 20 амбулантни возила биле испратени на местото на несреќата откако властите добиле пријава за инцидентот.

Повредените биле пренесени во болници на лекување, додека 16 лица биле прогласени за мртви на местото на несреќата, според првичниот биланс.

Министерот за здравство Калед Абдел Гафар наредил здравствените установи да го подигнат нивото на подготвеност и на повредените да им обезбедат неопходна медицинска грижа, лекови и медицински материјали.

Министерството соопшти дека медицинските тимови продолжуваат да ја следат состојбата.