Michael Gabriel Hernandez
21 Ноември 2024•Ажурирај: 22 Ноември 2024
ВАШИНГТОН (АА) - Американскиот Сенат синоќа со големо мнозинство отфрли три резолуции со кои би се стопирале три продажби на офанзивно оружје на Израел како одговор на тековните злосторства што се вршат во опколениот Појас Газа, јавува Анадолу.
Мерките, формално познати како заеднички резолуции за неодобрување, беа предложени од независниот сенатор Берни Сандерс. Тие би блокирале продажба од 774,1 милиони долари на 120-милиметарска муниција за тенкови, 61,1 милион долари за 120-милиметарски високоексплозивни минофрлачи и 262 милиони долари за комплети за наведување JDAM.
За сите продажби Конгресот беше известен за време на летниот одмор во август.
Речиси една петтина од Сенатот гласаше за резолуциите во одделни кругови на гласање, но не се успеа да се расчисти патот за она што е познато како предлог за пуштање понатаму, за кој потоа треба да се расправа и крајно да се гласа.
Мерките претставуваат значителен укор за претседателот Џо Бајден откако голем дел од поддршката што ја добија дојде од неговите колеги демократи, како и од независните со кои се во пратеничка група.
„Она што оваа екстремистичка влада го направи во Газа е неискажливо, но она што го прави уште поболно е што голем дел од ова е направено со американско оружје и со доларите од американските даночни обврзници. Само во последната година САД обезбедија воена помош од 18 милијарди долари за Израел и доставија повеќе од 50.000 тони воена опрема“, рече Сандерс на говорницата во Сенатот пред гласањето.
„Соединетите Американски Држави се соучесници во сите овие злосторства. Ние ги финансираме овие злосторства. Тоа соучесништво мора да заврши и тоа е она за што се однесуваат овие резолуции“, додаде тој.
Некои од пратениците што гласаа против блокирањето на продажбата на JDAM, опрема што ефективно претвора ненаведувана бомба во наведувана, се запрашаа зошто некој би бил против праќањето на комплетите за Израел.
„Очигледно, сенаторот Сандерс би сакал Израелците да користат помалку прецизно оружје во елиминирањето на терористите“, рече републиканскиот сенатор Тед Бад.
„Сега не е потребно ништо повеќе од здрав разум за да се сфати дека тоа ќе ја направи колатералната штета уште поверојатна. Во ревноста на сенаторот Сандерс да го ослаби нашиот сојузник, тој ќе ја зголеми веројатноста палестинските цивили, кои Хамас намерно ги користи како човечки штитови, да бидат убиени.“
Како одговор, Сандерс рече дека Израел користи JDAM за да ги гаѓа училиштата под раководство на ОН што се „преполни со раселени луѓе“ и центрите за бегалци, напади во кои загинаа „голем број невини луѓе“.
„Паметната бомба не спасува цивилни животи кога директно ги гаѓа цивилите“, рече тој.
Скот Пол, директор на програмата за мир и безбедност во „Оксфам Америка“, рече дека иако неуспехот на Сенатот претставува „уште едно горко разочарување“, гласовите покажуваат дека „повеќе демократски сенатори и повеќе луѓе низ САД не сакаат да бидат соучесници во злосторствата што Израел ги прави во Газа“.
Речиси 44.000 луѓе, од кои огромно мнозинство жени и деца, се убиени во Газа во текот на повеќегодишната војна на Израел, по прекуграничниот напад на Хамас на 7 октомври 2023 година.
Израелските ограничувања за испораката на многу неопходната хуманитарна помош ја влошија кризата што и онака беше ужасна пред почетокот на тековниот конфликт, но која стана експоненцијално полоша во месеците оттогаш.
