Блинкен и Галант разговараа по наводите дека САД подготвуваат санкции против израелски баталјон

ВАШИНГТОН (АА) - Американскиот државен секретар Ентони Блинкен телефонски разговараше со израелскиот министер за одбрана Јоав Галант, јавува Анадолу.

„Секретарот и министерот разговараа за напорите за заштита на безбедноста на Израел и преговорите за да се обезбеди ослободување на заложниците, да се овозможи итен прекин на огнот и да се зголеми протокот на спасувачка хуманитарна помош за палестинските цивили во Газа“, соопшти портпаролот на Стејт департментот, Метју Милер.

За време на повикот Блинкен „исто така ја истакна важноста на мерките за деескалација на тензиите во регионот“, се вели во соопштението.

Телефонскиот повик се случи откако новинската страница Аксиос во саботата објави дека Соединетите Американски Држави се подготвуваат да воведат санкции за баталјонот Нецах Јехуда на израелската армија поради кршење на човековите права извршени од борбената единица против Палестинците на окупираниот Западен Брег.

Бени Ганц, член на Воениот кабинет на Израел, соопшти дека побарал од Блинкен да ја преиспита одлуката, додавајќи дека вакви санкции ќе му наштетат на меѓународниот легитимитет на Израел за време на војната.

Израелскиот премиер Бенјамин Нетанјаху вчера вети дека ќе се бори против какви било санкции што се воведуваат врз воените единици на земјата.