Nur Asena Ertürk
21 Ноември 2024•Ажурирај: 22 Ноември 2024
АНКАРА (АА) - Шефот за надворешна политика на ЕУ, Жозеп Борел, денес изјави дека налозите за апсење на Меѓународниот кривичен суд за израелскиот премиер Бенјамин Нетанјаху и поранешниот министер за одбрана Јоав Галант не се „политички“ одлуки и мора да се „почитуваат“, јавува Анадолу.
Судот во Хаг претходно објави дека издал налози за апсење на Нетанјаху и Галант поради воените злосторства извршени на палестинските територии, вклучително и во Газа.
„Тоа не е политичка одлука, одлуката на судот мора да се почитува и спроведе“, изјави Борел на заедничката прес-конференција со министерот за надворешни работи на Јордан, Ајман Сафади, во Аман.
Борел нагласи дека одлуката е „обврзувачка“ и дека сите страни на судот, „кои ги вклучуваат сите членки на Европската Унија“, мора да ја спроведат одлуката.
Судот соопшти дека „нашол разумна основа“ да верува дека Нетанјаху и Галант сносат кривична одговорност за „военото злосторство гладување како метод на војување; и злосторствата против човештвото за убиства, прогон и други нехумани дејствија“.
„Исто така, верува дека и двајцата носат кривична одговорност како претпоставени за военото злосторство за намерно насочување напад врз цивилното население.“
Налозите се дадени откако израелската геноцидна офанзива во Газа неодамна влезе во својата втора година, при што веќе се убиени околу 44.000 Палестинци, повеќето од нив жени и деца.
Нападот на Израел го расели речиси целото население на територијата поради тековната и намерна блокада што доведе до сериозен недостиг на храна, чиста вода и лекови, туркајќи го населението на работ на глад.
