Братот на британскиот премиер, Џо Џонсон, поднесе оставка од функциите министер и пратеник

ЛОНДОН (АА) - Британскиот министер за бизнис, Џо Џонсон, брат на премиерот Борис Џонсон, денеска соопшти дека дава оставка од функциите во Министерството и во Долниот дом, пренесува Anadolu Agency (AA).

Џонсон, кој беше вклучен во кабинетот за Брегзит на премиерот Борис Џонсон, во соопштението наведува дека „политиката е премногу голема за него“.

„Чест ми беше да го претставувам Орпингтон девет години и да служам на функцијата министер под раководството на тројца премиери“, напиша Џо Џонсон на Твитер.

„Во последните недели бев распнат помеѓу лојалноста кон семејството и националните интереси - тоа е нерешлива тензија и време е други да ги преземат моите обврски како пратеник и министер“, рече тој.

Оставката дојде како последен удар за премиерот, кој оваа недела изгуби два значајни гласа во Долниот дом на британскиот Парламент, во однос на неговите планови да ја напушти ЕУ без договор, кој беше блокиран од парламентарците.

Вчера, над 20 пратеници од Конзервативната партија застанаа покрај опозициските партии и гласаа за Предлог-законот за одложување на Брегзит, кој се очекува да биде усвоен до понеделник.

Џонсон го изгуби работното мнозинство во Парламентот на почетокот на оваа недела откако Филип Ли, поранешниот министер, премина во редовите на либералдемократите.