Бројот на загинати во Судан од поплавите и обилните дождови се зголеми на 132

КАРТУМ (АА) - Бројот на загинати во Судан од поплавите поради урнатата брана и обилните дождови се зголеми на 132, соопштија властите доцна синоќа, јавува Анадолу.

Владиниот Комитет за вонредни состојби соопшти дека бројот на загинати во 10 провинции се искачи на 132, а погодени се 31.666 семејства и 129.650 лица.

Се додава дека поради обилните дождови целосно се урнати 12.420 дома, а делумно 11.472.

Силниот дожд во саботата ја поплави областа Арбат северно од градот Порт Судан на Црвеното Море, предизвикувајќи уривање на браната Арбат и потопување на цели села.

Стотици жители побегнале кон планинските врвови за да ја избегнат опасноста од поплавите, а други останале заробени во селата, пишува суданскиот дневен весник „Ал-Тагиер“.

Браната е изградена во 2003 година за собирање на дождовницата за да се употребува во сезоната на суша, но неколку години не е спроведено редовно одржување.