Велика Британија официјално ќе ја признае палестинската држава овој викенд

ЛОНДОН (АА) - Велика Британија официјално ќе ја признае палестинската држава овој викенд откако американскиот претседател Доналд Трамп ќе ја заврши својата државна посета, објави „Ди ај пејпер“, повикувајќи се на владини извори, јавува Анадолу.

Во јули, премиерот Кир Стармер изјави дека Велика Британија ќе ја признае палестинската државност на Генералното собрание на ОН во Њујорк во септември, освен ако Израел не преземе „суштински чекори“ за решавање на хуманитарната ситуација во Газа и не се согласи на прекин на огнот.

Причината за одложување на објавата до заминувањето на Трамп од Велика Британија е затоа што „можеше да се ризикува продлабочување на тензиите со Вашингтон, откако Трамп и државниот секретар Марко Рубио понудија силна поддршка за копнената офанзива на Израел во Газа“, се вели во извештајот.

Портпаролот на премиерот рече дека признавањето е наменето за заштита на одржливоста на решението за две држави.

„Државноста е неотуѓиво право на палестинскиот народ и апсолутно е клучно за заштита на одржливоста на решението за две држави јасно да се истакне тоа неотуѓиво право“, додаде тој.

Минатата година, Ирска, Норвешка и Шпанија се придружија на листата од 147 земји кои сега официјално ја признаваат Палестина.

Франција, исто така, објави планови за признавање на палестинската држава за време на Генералното собрание на ОН, станувајќи првата земја членка на Г7, неформален форум на седумте водечки индустријализирани земји и демократии, што го стори тоа.