Barış Seçkin
21 Ноември 2022•Ажурирај: 23 Ноември 2022
РИМ (АА) - Црноморскиот договор за жито со посредство на Туркије и Обединетоте нации (ОН) имаше повеќе позитивни резултати кои беа клучни за Украина, нејзиниот народ и светот во целина, истакна висок функционер во Организацијата за храна и земјоделство на ОН (ФАО), јавува Агенција Анадолија (АА).
Повеќе од 10 милиони тони украинско жито се испорачани откако Туркије, ОН, Русија и Украина потпишаа договор во Истанбул кон крајот на јули.
Тој беше продолжен минатата недела за уште 120 дена, уште еднаш преку клучните напори за посредување на Туркије и ОН.
„Извозот на 10 милиони тони жито од Украина ѝ помогна на самата земја и на другите низ светот“, изјави Максимо Тореро, главен економист во ФАО, во ексклузивно интервју за АА.
„Прво, ја зголеми достапноста на храна во светот“, рече тој.
„Во 2021 година, имаше повеќе од 800 милиони луѓе во светот изложени на ризик од хронична неисхранетост, криза што беше значително влошена со војната во Украина“, објасни тој.
„Војната избувна во време кога цените на храната веќе се зголемуваа поради економските последици од пандемијата на Ковид-19“, рече тој, додавајќи дека запирањето на извозот на жито од Украина уште повеќе ги зголемело цените и ја зголемило глобалната закана од неисхранетост.
Тореро рече дека договорот за жито со Украина постигнал витална цел со решавање на оваа мрачна ситуација.
Друг важен исход од договорот е тоа што тој обезбеди „земјоделците во Украина да бидат платени“, рече тој.
Тој, исто така, ѝ овозможи на Украина да го ослободи основниот капацитет за складирање на жито што „веќе ја достигнуваше својата граница“ за новата жетва.
