Вкупно 200 камиони со помош влегле вчера во Газа преку граничниот премин Рафа

ГАЗА (АА) - Вкупно 200 камиони со хуманитарна помош влегоа во Појасот Газа вчера преку египетскиот граничен премин Рафа за време на хуманитарната пауза меѓу Израел и палестинската група Хамас, јавува Анадолу.

Помошта вклучува четири камиони со гориво и други камиони кои носат вода, храна и лекови, изјави за Анадолу, Ваел Абу Мохсен, медиумскиот директор на преминот Рафа.

„Влезот на поголеми количини хуманитарна помош е предвидено да продолжи и во наредните часови“, додаде тој.

Катар доцна во понеделникот објави договор за продолжување на почетната четиридневна хуманитарна пауза во борбите меѓу Израел и Хамас за дополнителни два дена, според кој ќе се врши понатамошна размена на затвореници и ќе има повеќе можности за доставување помош.

Израел започна голема воена кампања во Појасот Газа по прекуграничниот напад на Хамас на 7 октомври.

Оттогаш во израелските напади загинаа 15.000 луѓе, од кои 6.150 деца и 4.000 жени, според здравствените власти во енклавата.

Бројот на загинати во Израел, според официјалните податоци, изнесува 1.200.